న్యూఢిల్లీ, 20 జూలై (హి.స.)

లోక్‌సభ వర్షాకాల సమావేశాలు ప్రారంభం కానున్న నేపథ్యంలో, తృణమూల్ కాంగ్రెస్ (TMC) పార్టీకి చెందిన 20 మంది రెబల్ ఎంపీలు 'నేషనలిస్ట్ సిటిజన్స్ పార్టీ ఆఫ్ ఇండియా' (NCPI) లో విలీనం అయ్యే ప్రతిపాదనపై లోక్‌సభ స్పీకర్ ఓం బిర్లా నేడు ఉదయం ఒక కీలక నిర్ణయాన్ని ప్రకటించే అవకాశం ఉందని అధికారిక వర్గాలు తెలిపాయి. పశ్చిమ బెంగాల్ అసెంబ్లీ ఎన్నికల్లో టీఎంసీ ఓటమి పాలైన తర్వాత మొత్తం 28 మంది టీఎంసీ లోక్‌సభ సభ్యులలో 20 మంది ఎంపీలు పార్టీ నాయకత్వంపై తిరుగుబాటు చేసి NCPI లో చేరారు. వీరంతా తమను రాజకీయ పార్టీగా గుర్తించాలని, అలాగే తాము బీజేపీ నేతృత్వంలోని ఎన్డీయే (NDA) కూటమిలో చేరడానికి సిద్ధంగా ఉన్నామని స్పీకర్‌కు ఒక పిటిషన్ సమర్పించారు.గత శనివారం నాటి పరిణామాలలో స్పీకర్ ఓం బిర్లా మహారాష్ట్ర డిప్యూటీ సీఎం ఏక్‌నాథ్ శిందే నేతృత్వంలోని శివసేనలో శివసేన (UBT) కి చెందిన ఆరుగురు రెబల్ ఎంపీల విలీనానికి ఆమోదం తెలిపారు కానీ టీఎంసీ రెబల్స్ నిర్ణయాన్ని మాత్రం వాయిదా వేశారు. అయినప్పటికీ, మాతృ పార్టీ ఎంపీలకు దూరంగా ఈ తిరుగుబాటు టీఎంసీ ఎంపీలకు సభలో ప్రత్యేక సీట్లు కేటాయించడానికి ఆయన అంగీకరించారు. ఈ విలీన ప్రక్రియకు సంబంధించి కేంద్ర ఎన్నికల సంఘం వద్ద NCPI రిజిస్ట్రేషన్ అయినట్లు చూపే ఆధారాలతో పాటు మరికొన్ని పత్రాలను సమర్పించాలని స్పీకర్ కార్యాలయం కోరగా, రెబల్స్ సీనియర్ నాయకురాలు కాకొలి ఘోష్ దస్తీదార్ ఆదివారం సాయంత్రం ఆ పత్రాలన్నింటినీ స్పీకర్ కార్యాలయానికి అందజేశారు.ఆ పత్రాలను పూర్తిగా పరిశీలించిన స్పీకర్ కార్యాలయం ఇప్పటికే తన అభిప్రాయాన్ని సిద్ధం చేసింది. నేడు ఉదయం 11 గంటలకు పార్లమెంట్ వర్షాకాల సమావేశాలు ప్రారంభం కావడానికి ముందే ఓం బిర్లా తన నిర్ణయాన్ని బహిరంగపరిచే అవకాశం ఉంది. ఈ ఉత్కంఠ భరిత పరిణామాల మధ్య ఆదివారం ప్రభుత్వం నిర్వహించిన ఆల్‌పార్టీ (సర్వపక్ష) సమావేశానికి ఎన్‌సీపీఐ ప్రతినిధులుగా సీనియర్ నాయకులు కాకొలి ఘోష్ దస్తీదార్, సుదీప్ బందోపాధ్యాయ్ హాజరయ్యారు. అధికారిక నిర్ణయం రాకముందే వారికి ఆహ్వానం అందించడం మరియు వారు సమావేశంలో పాల్గొనడంపై ఆగ్రహం వ్యక్తం చేసిన విపక్ష కూటమి మొత్తం కాసేపు సర్వపక్ష సమావేశం నుండి వాకౌట్ చేసి, ఆ తర్వాత మళ్లీ చర్చలలో పాల్గొనడానికి తిరిగి వచ్చింది. ఒకవేళ స్పీకర్ గనుక ఈ 20 మంది విలీనానికి గ్రీన్ సిగ్నల్ ఇస్తే పార్లమెంట్‌లో అధికార ఎన్డీయే కూటమి బలం మరింత పెరగనుంది.

---------------

హిందూస్తాన్ సమచార్ / Santhosha Laxmi