న్యూఢిల్లీ, 20 జూలై (హి.స.)

: భారత రాష్ట్రపతి ద్రౌపది ముర్ము సోమవారం యూరప్ దేశాల పర్యటనలో భాగంగా చారిత్రాత్మక మైలురాయిని అధిగమిస్తూ మాల్డోవా దేశానికి చేరుకున్నారు. ఒక భారతీయ దేశాధినేత మాల్డోవాలో పర్యటించడం దేశ చరిత్రలోనే ఇదే మొదటిసారి కావడం గమనార్హం. వాణిజ్యం, సాంకేతికత మరియు పర్యాటక రంగాలతో పాటు పలు కీలక రంగాలలో ద్వైపాక్షిక సంబంధాలను బలోపేతం చేసే లక్ష్యంతో ఆమె మూడు యూరప్ దేశాల అధికారిక పర్యటనను చేపట్టారు. ఇందులో భాగంగా మొదటి దేశంగా ఆమె మాల్డోవాలో అడుగుపెట్టారు. మాల్డోవా రాజధాని నగరమైన కిషినౌ అంతర్జాతీయ విమానాశ్రయానికి చేరుకున్న రాష్ట్రపతికి ఆ దేశ ఉప ప్రధాన మంత్రి మరియు విదేశాంగ మంత్రి మిహై పోప్‌సోయ్ ఘనస్వాగతం పలికారని రాష్ట్రపతి భవన్ ఎక్స్ (ట్విట్టర్) వేదికగా వెల్లడించింది.ఈ ఒక రోజు పర్యటనలో భాగంగా రాష్ట్రపతి ద్రౌపది ముర్ము మాల్డోవా అధ్యక్షురాలు మాయా సాందుతో ప్రతినిధుల స్థాయి చర్చలు జరపనున్నారు. అలాగే మాల్డోవా పార్లమెంట్ అధ్యక్షుడు ఇగోర్ గ్రోసుతో కూడా ఆమె ప్రత్యేకంగా సమావేశం కానున్నారు. దీనితో పాటు మాల్డోవా-ఇండియా పార్లమెంటరీ ఫ్రెండ్‌షిప్ గ్రూప్ సభ్యులతో చర్చలు జరపడం, అక్కడి బిజినెస్ ఫోరమ్‌ను ఉద్దేశించి ప్రసంగించడం మరియు మాల్డోవాలో నివసిస్తున్న భారతీయ సమాజం (ఇండియన్ కమ్యూనిటీ) తో ముఖాముఖి మాట్లాడటం వంటి పలు అధికారిక కార్యక్రమాలలో రాష్ట్రపతి పాల్గొననున్నారు. తూర్పు యూరప్‌లో పశ్చిమాన రొమేనియా, మిగిలిన మూడు వైపులా ఉక్రెయిన్ సరిహద్దుల మధ్య ఉన్న ఈ చిన్న దేశంలో దాదాపు 2,000 మంది భారతీయులు నివసిస్తుండగా, అందులో 1,800 మంది వైద్య విద్యార్థులే కావడం విశేషం.ఈ మూడు దేశాల పర్యటనలో భాగంగా మాల్డోవా పర్యటన ముగిసిన తర్వాత జూలై 21-22 తేదీలలో ఆమె ఉత్తర మాసిడోనియా దేశాన్ని సందర్శించనున్నారు. ఒక భారత రాష్ట్రపతి ఈ దేశంలో పర్యటించడం కూడా ఇదే తొలిసారి అవుతుంది. అనంతరం పర్యటన చివరి దశలో భాగంగా జూలై 23-25 తేదీలలో రొమేనియా దేశాధినేత నికుసర్ డాన్ ఆహ్వానం మేరకు ఆమె రొమేనియాలో పర్యటించనున్నారు. దాదాపు మూడు దశాబ్దాల తర్వాత భారత రాష్ట్రపతి రొమేనియాను సందర్శించడం ఇదే మొదటిసారి. తూర్పు యూరప్ ప్రాంత దేశాలతో సత్సంబంధాలను మెరుగుపరచుకోవడానికి భారతదేశం ఇస్తున్న ప్రాధాన్యతకు ఈ పర్యటన అద్దం పడుతోంది. ఈ ఉన్నత స్థాయి పర్యటనలో రాష్ట్రపతితో పాటు కేంద్ర సహాయ మంత్రి నిముబెన్ జయంతిభాయ్ బంభానియా, రాజ్యసభ సభ్యుడు దినేష్ శర్మ, లోక్‌సభ సభ్యుడు విజయ్ బఘేల్ అధికారిక ప్రతినిధులుగా వెళ్లారు

---------------

హిందూస్తాన్ సమచార్ / Santhosha Laxmi