హైదరాబాద్, 21 ఆగస్టు (హి.స.)

హైదరాబాద్ నగరంలోని ఐటీ కారిడార్‌లో ట్రాఫిక్ కష్టాలను శాశ్వతంగా దూరం చేసేలా హైదరాబాద్ మెట్రో ఫేజ్-2 (Phase-2) విస్తరణ పనులకు ముఖ్యమంత్రి ఎనుముల రేవంత్ రెడ్డి ఇవాళ ఉదయం శంకుస్థాపన చేశారు. రాయదుర్గం మెట్రో స్టేషన్ నుండి అమెజాన్, విప్రో సర్కిల్ మీదుగా నానక్‌రామ్‌గూడ, ఫైనాన్షియల్ డిస్ట్రిక్ట్ వరకు ఈ కొత్త లైన్‌ను నిర్మించనున్నారు. దాదాపు రూ. 4,500 కోట్ల అంచనా వ్యయంతో చేపట్టే ఈ ప్రాజెక్టుకు సంబంధించిన మ్యాప్ మరియు స్టేషన్ల వివరాలను సీఎం ఇవాళ అధికారికంగా విడుదల చేశారు.

ఈ విస్తరణ వల్ల గచ్చిబౌలి, మాదాపూర్, కోకాపేట ప్రాంతాల్లో పనిచేసే లక్షలాది మంది ఐటీ ఉద్యోగులకు ప్రయాణ సమయం గణనీయంగా తగ్గనుంది. శంకుస్థాపన సభలో సీఎం రేవంత్ రెడ్డి మాట్లాడుతూ, హైదరాబాద్‌ను గ్లోబల్ సిటీగా మార్చడమే తమ ప్రభుత్వ లక్ష్యమని, మెట్రో రెండో దశను రాబోయే 30 నెలల్లోనే పూర్తి చేసి అందుబాటులోకి తెస్తామని స్పష్టం చేశారు. ఈ ప్రాజెక్టులో భాగంగా భవిష్యత్తు అవసరాల కోసం అండర్ గ్రౌండ్ స్టేషన్ల నిర్మాణానికి కూడా ప్రతిపాదనలు సిద్ధం చేశారు. ఇవాళ మధ్యాహ్నం నుండి ఈ రూట్‌లో భూసార పరీక్షలు (Soil Testing) మరియు ప్రాథమిక ఇంజనీరింగ్ పనులు వేగంగా ప్రారంభమయ్యాయి.

---------------

హిందూస్తాన్ సమచార్ / Santhosha Laxmi