న్యూఢిల్లీ, 04 ఆగస్టు (హి.స.)

ఇండియన్ రైల్వే సరుకు రవాణా

విభాగంలో మరో రికార్డును సొంతం చేసుకుంది. దేశవ్యాప్తంగా పారిశ్రామిక, వ్యవసాయ రంగాల అవసరాలకు అనుగుణంగా రైల్వే శాఖ సరుకు రవాణా సామర్థ్యాన్ని భారీగా పెంచుతోంది. ఫలితంగా 2026 జూలై నెలలో గత ఏడాదితో పోలిస్తే 9 శాతం అధికంగా 141 మిలియన్ టన్నుల సరుకును రవాణా చేసినట్లు ఇండియన్ రైల్వే ప్రకటించింది. ఈ వృద్ధి భారత ఆర్థిక వ్యవస్థలో రైల్వేల ప్రాధాన్యాన్ని మరింత బలోపేతం చేస్తోందని అధికారులు పేర్కొన్నారు.

సరుకు రవాణాలో బొగ్గు ఇప్పటికీ ప్రధాన వాటాను కొనసాగిస్తోంది. మొత్తం రవాణాలో బొగ్గు వాటా 22.2 శాతంగా ఉండగా, ఎరువుల రవాణా 12 శాతం, ఆహార ధాన్యాల రవాణా 11.5 శాతం మేర పెరిగినట్లు రైల్వే శాఖ వెల్లడించింది. విద్యుత్ ఉత్పత్తి కేంద్రాలు, వ్యవసాయ రంగం, ప్రజా పంపిణీ వ్యవస్థకు అవసరమైన సరుకులను వేగంగా గమ్యస్థానాలకు చేరవేయడంలో రైల్వేలు కీలక పాత్ర పోషిస్తున్నాయి. వివిధ రంగాల్లో పెరుగుతున్న డిమాండ్కు అనుగుణంగా సరుకు రవాణా సేవలను మరింత విస్తరిస్తున్నట్లు అధికారులు తెలిపారు.

అదేవిధంగా, రైల్వేల సరుకు రవాణా ద్వారా వచ్చే ఆదాయంలో కూడా గణనీయమైన వృద్ధి నమోదైంది. ఈ విభాగం ద్వారా రైల్వేలకు వచ్చిన ఆదాయం సుమారు 20 శాతం పెరిగినట్లు అధికారులు వెల్లడించారు. రవాణా సామర్థ్యాన్ని పెంచడం, సరుకు రైళ్ల నిర్వహణను మరింత సమర్థవంతంగా చేయడం, ప్రత్యేక ఫ్రైట్ కారిడార్ల అభివృద్ధి వంటి చర్యల ఫలితంగానే ఈ పురోగతి సాధ్యమైందని పేర్కొన్నారు. భవిష్యత్తులో సరుకు రవాణాను మరింత విస్తరించేందుకు రైల్వే శాఖ పలు ప్రణాళికలను అమలు చేస్తోంది. పారిశ్రామిక సంస్థలు, వ్యవసాయ రంగం, లాజిస్టిక్స్ కంపెనీల అవసరాలకు అనుగుణంగా సేవలను మెరుగుపరచడంతో పాటు, సరుకు రవాణా సమయాన్ని తగ్గించి ఖర్చులను నియంత్రించే దిశగా చర్యలు చేపడుతోంది. దేశ ఆర్థికాభివృద్ధికి రైల్వేలు కీలక చోదకశక్తిగా నిలవడంతో పాటు, సరుకు రవాణా రంగంలో కొత్త రికార్డులు సృష్టించే దిశగా ముందుకు సాగుతున్నాయని అధికారులు తెలిపారు.

---------------

హిందూస్తాన్ సమచార్ / విడియాల వెంకటేశ్వర్ రావు