న్యూఢిల్లీ, 05 ఆగస్టు (హి.స.)

థాయిలాండ్‌లోని ఫుకెట్ నుంచి న్యూఢిల్లీ వస్తున్న ఎయిర్ ఇండియా AI2379 విమానంలో మంగళవారం ఉదయం తీవ్ర కలకలం రేగింది. దాదాపు 134 మంది ప్రయాణికులు, 8 మంది సిబ్బందితో ప్రయాణిస్తున్న ఈ విమానం, గాల్లో ఉన్న సమయంలో ఒక్కసారిగా తీవ్రమైన కుదుపులకు (టర్బులెన్స్) గురైంది. ఎలాంటి ముందస్తు హెచ్చరిక లేకుండా విమానం సుమారు 300 అడుగుల ఎత్తు నుంచి ఒక్కసారిగా కిందికి పడిపోవడంతో ప్రయాణికులు తీవ్ర భయాందోళనకు గురయ్యారు.ఈ ఆకస్మిక ప్రమాదం వల్ల సీటు బెల్టులు పెట్టుకోని కొందరు ప్రయాణికులు, విధుల్లో ఉన్న క్యాబిన్ సిబ్బంది సీట్లలోంచి లేచి విమానం పైభాగానికి (సీలింగ్‌కు) బలంగా ఢీకొన్నారు. లోపల ఉన్న లగేజీ బాక్సులు తెరుచుకుని సామాన్లు కిందపడటంతో పాటు సీలింగ్ ప్యానల్స్ కూడా దెబ్బతిన్నాయి. ఈ ఊహించని కుదుపుల కారణంగా మొత్తం 13 మంది ప్రయాణికులు, నలుగురు క్యాబిన్ సిబ్బంది గాయపడ్డారు. వీరిలో ఒక సిబ్బందికి తీవ్ర గాయాలవ్వగా, మిగిలిన వారికి తలలు, వీపు భాగాల్లో స్వల్ప గాయాలయ్యాయి. ఇలాంటి అత్యవసర పరిస్థితిలోనూ పైలట్లు అప్రమత్తంగా వ్యవహరించి విమానాన్ని తమ నియంత్రణలోకి తెచ్చారు. ఉదయం 11:07 గంటల ప్రాంతంలో ఢిల్లీలోని ఇందిరాగాంధీ అంతర్జాతీయ విమానాశ్రయంలో విమానం సురక్షితంగా ల్యాండ్ అయింది. విమానాశ్రయం వద్ద అప్పటికే సిద్ధంగా ఉన్న వైద్య బృందాలు క్షతగాత్రులను వెంటనే ఆసుపత్రికి తరలించి చికిత్స అందించారు. ప్రస్తుతం ఈ ప్రమాదంపై విమానయాన నియంత్రణ సంస్థ (DGCA) అధికారిక విచారణ చేపట్టింది, అలాగే ప్రయాణికులకు అవసరమైన అన్ని సహాయ సహకారాలు అందిస్తున్నట్లు ఎయిర్ ఇండియా ప్రకటించింది

---------------

హిందూస్తాన్ సమచార్ / Santhosha Laxmi