అమృత్‌సర్‌, 20 సెప్టెంబర్ (హి.స.)

పంజాబ్‌లోని అమృత్‌సర్‌లో ఏఎస్‌ఐ (ASI) శమ్‌షేర్ సింగ్ దారుణ హత్య ఉదంతం తీవ్ర సంచలనం రేపిన సంగతి తెలిసిందే. ఈ కేసుకు సంబంధించి పరారీలో ఉన్న ప్రధాన నిందితుడిని పట్టుకునేందుకు పోలీసులు గాలింపు చర్యలు చేపట్టగా, అనూహ్య పరిణామం చోటుచేసుకుంది. పోలీసుల కంటికి చిక్కిన నిందితుడు లొంగిపోవడానికి నిరాకరిస్తూ ఎదురుదాడికి దిగాడు. అధికారులపైకి కాల్పులు జరపడంతో, అప్రమత్తమైన పోలీసులు జరిపిన ఆత్మరక్షణ కాల్పుల్లో అతడు తీవ్రంగా గాయపడి తుదిశ్వాస విడిచాడు.

మరొకవైపు ఈ హత్య వెనుక కేవలం వ్యక్తిగత కక్షలే ఉన్నాయా లేక మరేదైనా పెద్ద వ్యూహం ఉందా అనే కోణంలో దర్యాప్తు వేగవంతమైంది. పాకిస్తాన్ కేంద్రంగా సాగుతున్న ఉగ్రవాద కార్యకలాపాలు, సరిహద్దు దాటి జరిగే మత్తు పదార్థాల అక్రమ రవాణా నెట్‌వర్క్‌ల హస్తం ఈ ఘటనలో ఉండి ఉండవచ్చని అనుమానిస్తున్నారు. పంజాబ్‌లో శాంతిభద్రతలకు విఘాతం కలిగించేందుకు కుట్ర పన్నుతున్నారా అన్న దిశగా అధికారులు సాంకేతిక ఆధారాలు, ఫోన్ కాల్స్ డేటాను సమగ్రంగా విశ్లేషిస్తున్నారు.

---------------

హిందూస్తాన్ సమచార్ / Santhosha Laxmi