అమృతపురి, 24 సెప్టెంబర్ (హి.స.)

మాతా అమృతానందమయి దేవి 73వ జన్మదిన వేడుకలు అత్యంత వైభవంగా ప్రారంభమయ్యాయి. కేరళలోని కొల్లం జిల్లా అమృతపురి అమృత విశ్వ విద్యపీఠం ప్రాంగణంలో ఈ వేడుకలను 'విశ్వ సేవా దినం' (Vishwa Seva Dinam) రూపంలో నిర్వహిస్తున్నారు. రెండు రోజుల పాటు సాగే ఈ వేడుకలకు దేశంలోని ప్రముఖ రాజకీయ నాయకులు, ఆధ్యాత్మికవేత్తలు హాజరవుతున్నారు.

వేడుకల్లో భాగంగా మొదటి రోజు సెప్టెంబర్ 26న సాయంత్రం 5 గంటలకు జరిగే బహిరంగ సభను కేంద్ర హోంమంత్రి అమిత్ షా అధికారికంగా ప్రారంభించనున్నారు. అలాగే రెండవ రోజైన సెప్టెంబర్ 27వ తేదీ ఉదయం 11 గంటలకు జరిగే ప్రధాన వేడుకకు దేశ ఉపరాష్ట్రపతి సి.పి. రాధాకృష్ణన్ ముఖ్య అతిథిగా విచ్చేయనున్నారు. ఈ కార్యక్రమంలో కేరళ గవర్నర్ రాజేంద్ర విశ్వనాథ్ అర్లేకర్, ముఖ్యమంత్రి వి.డి. సతీశన్, కేంద్ర మంత్రి కింజరాపు రామ్మోహన్ నాయుడు తదితరులు పాల్గొననున్నారు.

ఈ జన్మదిన వేడుకలను పురస్కరించుకుని మాతా అమృతానందమయి మఠం దాదాపు రూ. 50 కోట్లకు పైగా వ్యయంతో భారీ మానవతా సేవా కార్యక్రమాలను ప్రకటిస్తోంది. ఇందులో భాగంగా అమృత ఆసుపత్రి ద్వారా నిరుపేదలకు ఉచిత అవయవ మార్పిడి, శస్త్రచికిత్సలు, స్వయం సహాయక బృందాలకు ఆర్థిక చేయూత అందించనున్నారు. త్రిసూర్ టపాసుల ప్రమాద బాధితులకు, సముద్రంలో ప్రాణాలు కోల్పోయిన మత్స్యకారుల కుటుంబాలకు ఆర్థిక సహాయం అందజేయడంతో పాటు అస్సాం వరద సహాయక నిధికి విరాళం ప్రకటించనున్నారు.

సెప్టెంబర్ 26న జరిగే సభలో ప్రముఖ రచయిత, మాజీ గవర్నర్ పి.ఎస్. శ్రీధరన్ పిళ్ళైకి ప్రతిష్టాత్మక 'అమృత కీర్తి పురస్కారం' ప్రదానం చేయనున్నారు. అలాగే సెప్టెంబర్ 27న ఉదయం శ్రీ గురు పాదుక పూజ, భజనలు, ప్రపంచ శాంతి కోసం విశేష ప్రార్థనలతో పాటు నిరుపేద జంటలకు సామూహిక వివాహాలు (మంగళసమృద్ధి) నిర్వహించనున్నారు.

---------------

హిందూస్తాన్ సమచార్ / Santhosha Laxmi