బెంగళూరు, 24 సెప్టెంబర్ (హి.స.)

దేశవ్యాప్తంగా సంచలనం సృష్టిస్తున్న మోసపూరిత బీమా క్లెయిమ్‌ల అక్రమాలను అరికట్టేందుకు కర్ణాటక ప్రభుత్వం రాష్ట్రవ్యాప్తంగా ఒక ప్రత్యేక దర్యాప్తు బృందాన్ని ఏర్పాటు చేసింది. సుప్రీంకోర్టు ఇచ్చిన స్పష్టమైన ఆదేశాల అనుగుణంగా రాష్ట్ర హోం శాఖ ఈ మేరకు అధికారిక ఉత్తర్వులు జారీ చేసింది.

ఈ ప్రత్యేక బృందానికి కర్ణాటక రాష్ట్రవ్యాప్తంగా పూర్తి అధికార పరిధి ఉంటుంది. సమర్థవంతమైన దర్యాప్తు కోసం దీనిని భారతీయ నాగరిక సురక్ష సంహిత, 2023లోని సెక్షన్ 2(1)(u) కింద ప్రత్యేక పోలీస్ స్టేషన్‌గా నోటిఫై చేశారు. ఈ బృందానికి ఇన్‌స్పెక్టర్ జనరల్ ఆఫ్ పోలీస్ లేదా డిప్యూటీ ఇన్‌స్పెక్టర్ జనరల్ స్థాయి అధికారి ఛైర్మన్‌గా వ్యవహరిస్తారు. సీఐడీ ఎస్పీ, డీజీపీ నామినేట్ చేసిన డీఎస్పీ మరియు ముగ్గురు ఇన్‌స్పెక్టర్లు ఇందులో సభ్యులుగా ఉంటారు.

ఒకే వాహనాన్ని వేర్వేరు ప్రమాదాల్లో చూపించి, బీమా కంపెనీల నుంచి భారీ మొత్తంలో అక్రమంగా పరిహారం పొందుతున్న పెద్దఎత్తున జరుగుతున్న మోసాలపై సుప్రీంకోర్టు తీవ్ర ఆగ్రహం వ్యక్తం చేసింది. ఇలాంటి నకిలీ క్లెయిమ్‌ల దందాను అణచివేయడానికి ప్రతి రాష్ట్రంలోనూ డెడికేటెడ్ ఎస్‌ఐటీలను ఏర్పాటు చేయాలని సర్వోన్నత న్యాయస్థానం ఆదేశించింది. దీనికి అనుగుణంగా బీమా కంపెనీల నుంచి అందే మోసపూరిత క్లెయిమ్‌లకు సంబంధించిన ఫిర్యాదులన్నింటినీ డీజీపీ ఈ ఎస్‌ఐటీకి బదిలీ చేస్తారు. ఈ బృందం వేగంగా దర్యాప్తు పూర్తి చేసి నిందితులపై కోర్టులో తుది నివేదికలు సమర్పిస్తుంది. ఇలాంటి నకిలీ క్లెయిమ్‌ల వల్ల బీమా రంగం ఎదుర్కొంటున్న నష్టాలను నివారించడంతో పాటు, కుమ్మక్కై మోసాలకు పాల్పడే ముఠాల భరతం పట్టడానికి ఈ ప్రత్యేక దర్యాప్తు బృందం ఎంతగానో దోహదపడనుంది.

---------------

హిందూస్తాన్ సమచార్ / Santhosha Laxmi