ముంబై, 03 సెప్టెంబర్ (హి.స.)

అంతర్జాతీయ మార్కెట్లో సానుకూల పరిస్థితుల నేపథ్యంలో విదేశీ మారక ద్రవ్య మార్కెట్లో భారత రూపాయి బలంగా పుంజుకుంది. గురువారం ప్రారంభ ట్రేడింగ్లోనే అమెరికా డాలర్తో పోలిస్తే భారత రూపాయి మారకం విలువ ఏకంగా 47 పైసలు పెరిగి 94.26 స్థాయికి చేరుకుంది. ఇంటర్బ్యాంక్ ఫారిన్ ఎక్స్చేంజ్ మార్కెట్ ఆరంభంలో 94.30 వద్ద ప్రారంభమైన రూపాయి, కొనుగోళ్ల మద్దతుతో మరింత బలపడి 94.26 వద్దకు చేరి లాభాల్లో ట్రేడవుతోంది. అంతకుముందు బుధవారం ముగింపు సమయానికి రూపాయి విలువ 22 పైసలు లాభపడి 94.73 వద్ద స్థిరపడగా, తాజా సెషన్లోనూ అదే సానుకూల జోరును కొనసాగించి ఒక్కసారిగా భారీ ఎత్తున పురోగతి సాధించింది.

దేశంలో విదేశీ మారక ద్రవ్య లిక్విడిటీని పెంపొందించేందుకు రిజర్వ్ బ్యాంక్ ఆఫ్ ఇండియా (RBI) ప్రవేశపెట్టిన ప్రత్యేక చర్యల్లో భాగంగా, ఎఫ్సీఎన్ఆర్(బి) డిపాజిట్ల ద్వారా రికార్డు స్థాయిలో భారీగా విదేశీ నిధులు వచ్చి చేరడమే రూపాయికి ప్రధాన ఊతంగా నిలిచిందని ఫారెక్స్ మార్కెట్ నిపుణులు విశ్లేషిస్తున్నారు.

---------------

హిందూస్తాన్ సమచార్ / విడియాల వెంకటేశ్వర్ రావు