న్యూఢిల్లీ, 19 అక్టోబర్ (హి.స.)

గాజాలో హమాస్, లెబనాన్లో

హిజ్బుల్లాలపై విరుచుకుపడుతున్న ఇజ్రాయెల్ కు భారీ షాక్ తగిలింది. ఆ దేశ ప్రధాని బెంజమిన్ నెతన్యాహు లక్ష్యంగా శనివారం డ్రోన్ దాడి జరిగింది. సిజేరియా పట్టణంలోని నెతన్యాహు ప్రయివేట్ నివాసం సమీపంలోనే డ్రోన్ పడినట్టు తెలుస్తోంది. ఇజ్రాయెల్ డిఫెన్స్ ఫోర్సెస్ (ఐడీఎఫ్) కూడా ఈ విషయాన్ని ధ్రువీకరించింది. లెబనాన్ వైపు నుంచి ఈ దాడి జరిగిందని వెల్లడించింది. అయితే దాడి సమయంలో నెతన్యాహు, ఆయన కుటుంబ సభ్యులు ఇంట్లో లేరని.. దీంతో ఎలాంటి ప్రమాదం వాటిల్లలేదని పేర్కొంది. నెతన్యాహు టార్గెట్ గానే ఈ అటాక్ జరిగిందని భావిస్తున్నట్టు తెలిపింది.

లెబనాన్ నుంచి దూసుకొచ్చిన మూడు డ్రోన్లు

లెబనాన్ భూభాగం నుంచి మూడు డ్రోన్లు ఇజ్రాయెల్ పైకి దూసుకొచ్చినట్టు ఐడీఎఫ్ తెలిపింది. వీటిలో ఒకటి సీజేరియా పట్టణంలోని ఓ భవనంపై పడింది. తర్వాత మరో రెండు డ్రోన్లను ఐడీఎఫ్ దళాలు అడ్డుకున్నాయి. ఈ క్రమంలో ఇజ్రాయెల్ రాజధాని టెల్ అవీవు ఉత్తరాన ఉన్న గ్లిలాట్ సైనిక స్థావరం వద్ద హెచ్చరిక సైరన్లు మోగాయి. ఈ ఘటనలపై విచారణ జరుపుతున్నట్టు ఇజ్రాయెల్ తెలిపింది. పశ్చిమాసియాలో ఉద్రిక్తతలు నెలకొన్ని వేళ నెతన్యాహు లక్ష్యంగా దాడి జరగడంతో ఆందోళనలు నెలకొన్నాయి. హమాస్ చీఫ్ యహ్యా సిన్వార్ను ఇజ్రాయెల్ హతం చేసిన కొద్ది రోజుల్లోనే ఈ దాడి జరగడం గమనార్హం.

---------------

హిందూస్తాన్ సమచార్ / బచ్చు రంజిత్ కుమార్, జర్నలిస్ట్