అమరావతి, 14 అక్టోబర్ (హి.స.)

రాష్ట్రంలో స్థానిక సంస్థల ఎన్నికల నిర్వహణకు రాష్ట్ర ఎన్నికల సంఘం (ఎస్ఈసీ) సిద్ధమైంది. బుధవారం ఉదయం 11:30 గంటలకు విజయవాడలోని రాష్ట్ర ఎన్నికల సంఘం కార్యాలయంలో ఎస్ఈసీ కమిషనర్ అనిల్ చంద్ర పునేఠా స్థానిక ఎన్నికల షెడ్యూల్ను విడుదల చేయనున్నారు.

అదే సమయంలో మున్సిపాలిటీలు, కార్పొరేషన్ల ఎన్నికలకు సంబంధించిన నోటిఫికేషన్ను కూడా జారీ చేయనున్నారు. మున్సిపల్, కార్పొరేషన్ ఎన్నికల కోసం ఈ నెల 16 నుంచి 18 వరకు నామినేషన్లు స్వీకరించే అవకాశం ఉన్నట్లు సమాచారం. ఈ నెల 21లోపు నామినేషన్ల ఉపసంహరణ ప్రక్రియను పూర్తి చేయనున్నట్లు తెలుస్తోంది. అనంతరం ఈ నెల 28న పోలింగ్ నిర్వహించి, 30న ఓట్ల లెక్కింపు చేపట్టే అవకాశమున్నట్లు సమాచారం. మరోవైపు ఎంపీటీసీ, జడ్పీటీసీ ఎన్నికలకు సంబంధించి ఈ నెల 19న నోటిఫికేషన్ విడుదల చేసే అవకాశం ఉంది. ఈ ఎన్నికల కోసం ఈ నెల 21 నుంచి 23 వరకు నామినేషన్లు స్వీకరణ, 27 వరకు నామినేషన్ల ఉపసంహరణకు అవకాశం. నవంబర్ 3న పోలింగ్, నవంబర్ 5న ఓట్ల లెక్కింపు చేపట్టే అవకాశముందని తెలుస్తోంది.

---------------

హిందూస్తాన్ సమచార్ / నిత్తల రాజీవ