గౌహతి, 19 అక్టోబర్ (హి.స.)

దేశవ్యాప్తంగా ఉమ్మడి పౌర స్మృతి (యూనిఫాం సివిల్ కోడ్ - UCC) ని అమలు చేయాలనే డిమాండ్‌కు అస్సాం ముఖ్యమంత్రి హిమంత బిశ్వ శర్మ మరోసారి గట్టి మద్దతు తెలిపారు. దేశంలో అందరి పౌరులకూ సమానమైన చట్టాలు లేకపోవడం వల్ల అత్యంత తీవ్రంగా నష్టపోతోంది ముస్లిం మహిళలేనని ఆయన అభిప్రాయపడ్డారు. మత ఆధారిత పర్సనల్ లాస్ వల్ల వారు సామాజికంగా, న్యాయపరంగా తీవ్ర వివక్షకు గురవుతున్నారని పేర్కొన్నారు.

బహుభార్యత్త్వం (Polygamy), ముస్లిం మహిళల వివాహ వయస్సు మరియు వారసత్వ హక్కుల వంటి కీలక విషయాలను సీఎం హిమంత ప్రస్తావించారు. దేశంలో బహుభార్యత్వాన్ని పూర్తిగా నిషేధించాల్సిన అవసరం ఉందన్నారు. పురుషులకు లభించే సమాన హక్కులు, భద్రత ముస్లిం మహిళలకు కూడా దక్కాలంటే ఉమ్మడి పౌర స్మృతి ఒక్కటే పరిష్కారమని ఆయన స్పష్టం చేశారు. లింగ సమానత్వం, మహిళా సాధికారత సాధించాలంటే రాజ్యాంగంలోని సమానత్వ హక్కును అందరికీ వర్తింపజేయాలని ఆయన వ్యాఖ్యానించారు.

అస్సాంలో ఇప్పటికే బహుభార్యత్వాన్ని నిషేధించడానికి ప్రత్యేక చట్టాన్ని తీసుకువచ్చేందుకు తమ ప్రభుత్వం కసరత్తు చేస్తోందని తెలిపారు. ఉత్తరాఖండ్ రాష్ట్రం ఇప్పటికే యుసిసిని విజయవంతంగా అమలు చేసిందని, ఇతర రాష్ట్రాలు కూడా ఆ దిశగా అడుగులు వేయాలని సీఎం పిలుపునిచ్చారు. యూసీసీ అనేది ఏ ఒక్క మతానికి వ్యతిరేకం కాదని, అది దేశ సౌభ్రాతృత్వానికి, మహిళల హక్కుల రక్షణకు దోహదపడే ప్రగతిశీల నిర్ణయమని హిమంత బిశ్వ శర్మ ఉద్ఘాటించారు.

---------------

హిందూస్తాన్ సమచార్ / Santhosha Laxmi