న్యూఢిల్లీ, 21 అక్టోబర్ (హి.స.)

భారతదేశ ప్రగతిని అడ్డుకోవడానికి, సమాజంలో చీలికలు తెచ్చేందుకు మరియు భారతీయ సంస్కృతి, హిందూ మతంపై ద్వేషాన్ని వ్యాప్తి చేయడానికి కొన్ని శక్తులు ప్రయత్నిస్తున్నాయని భారతీయ జనతా పార్టీ (BJP) బుధవారం తీవ్ర ఆరోపణలు చేసింది. ఇలాంటి దేశ వ్యతిరేక ఎజెండాలను మోదీ ప్రభుత్వం ఎట్టిపరిస్థితుల్లోనూ విజయవంతం కాబోనివ్వదని స్పష్టం చేసింది. న్యూఢిల్లీలోని బీజేపీ కేంద్ర కార్యాలయంలో నిర్వహించిన విలేకరుల సమావేశంలో బీజేపీ జాతీయ అధికార ప్రతినిధి, రాజ్యసభ ఎంపీ డాక్టర్ సుధాంశు త్రివేది మాట్లాడారు.

విజయదశమి సందర్భంగా ప్రధానమంత్రి నరేంద్ర మోదీ ఇలాంటి శక్తుల పట్ల దేశాన్ని అప్రమత్తం చేశారని త్రివేది గుర్తుచేశారు. ఈ శక్తులు ప్రధానంగా మూడు లక్ష్యాలతో పనిచేస్తున్నాయని ఆయన ఆరోపించారు. రాజకీయ అధికారాన్ని వ్యక్తిగత లాభాల కోసం, దోపిడీ కోసం ఉపయోగించుకోవడం, సమాజంలో విభజనలు సృష్టించడం, మరియు భారతీయ సంస్కృతి, సనాతన ధర్మంపై ద్వేషాన్ని పెంచడం వీరి ప్రధాన ఎజెండా అని మండిపడ్డారు. సనాతన ధర్మాన్ని, హిందుత్వాన్ని నిర్మూలించేందుకు కొన్ని గ్రూపులు ప్రచారం సాగిస్తున్నాయని, భారతీయ సంస్థలపై తప్పుడు ప్రచారాలు చేస్తూ దేశ అభివృద్ధిని అడ్డుకుంటున్నాయని ధ్వజమెత్తారు.

వివిధ ఉద్యమాలు, నిరసనల్లో ప్రతిసారీ డిమాండ్లు మారుతుండటాన్ని త్రివేది తప్పుబట్టారు. ఒకసారి ఎల్‌ఐసీ (LIC), హెచ్‌ఏఎల్ (HAL), ఎస్‌బీఐ (SBI), సెబీ (SEBI)లపై ప్రశ్నలు లేవనెత్తుతారని, మరోసారి వ్యాక్సిన్‌లు, ఈవీఎంలు (EVMs), ఓటర్ల జాబితాలపై విమర్శలు చేస్తారని అన్నారు. ఈ ధోరణిని రామాయణంలోని రావణుడి పది తలలతో ఆయన పోల్చారు. ఒక తల నరికితే మరో తల వచ్చినట్లు, ఒక డిమాండ్ తర్వాత మరో డిమాండ్ నిరంతరం మారుతూ వస్తోందని, వీటన్నింటి వెనుక ఒకే ఉమ్మడి ఎజెండా దాగి ఉందనే అనుమానాన్ని వ్యక్తం చేశారు. రావణుడు సీతను అపహరించడానికి సన్యాసి వేషంలో వచ్చినట్లుగానే, ప్రస్తుత కొన్ని శక్తులు కూడా విభిన్న రూపాల్లో తమ అసలు ఉద్దేశాలను దాచిపెట్టి పనిచేస్తున్నాయని ఆరోపించారు.

కొంతమంది నాయకులు విదేశీ పర్యటనల నుంచి తిరిగి వచ్చిన తర్వాత విచిత్రమైన ప్రకటనలు చేస్తున్నారని త్రివేది విమర్శించారు. విదేశాల నుంచి రాగానే ఒకరు ‘హైడ్రోజన్ బాంబు’ వేస్తామని అంటారని, మరొకరు ‘సునామీ’ వస్తుందని జోస్యం చెప్తారని ఎద్దేవా చేశారు. శివసేన (యుబిటి) నాయకుడు సంజయ్ రౌత్ చేసిన వ్యాఖ్యలను కూడా ఆయన ఈ సందర్భంగా ప్రస్తావించారు. సరిహద్దుల అవతలి నుంచి భారతదేశంలో అశాంతిని సృష్టించేందుకు కొన్ని గుర్తుతెలియని, అనుమానాస్పద శక్తులు వీరి వెనుక ఉండి నడిపిస్తున్నాయనే ఆందోళనను ఆయన వ్యక్తంచేశారు. హింసాత్మక ఘర్షణలు మరియు ప్రణాళికాబద్ధమైన కుట్రల ద్వారా ఇక్కడ 'రెజీమ్ చేంజ్' (ప్రభుత్వాన్ని పడగొట్టడం) చేయాలని చూస్తున్నారని, దేశవ్యాప్తంగా ప్రజలు ఈ శక్తుల అంతర్గత ఉద్దేశాలను అర్థం చేసుకోవాలని త్రివేది పిలుపునిచ్చారు.

---------------

హిందూస్తాన్ సమచార్ / Santhosha Laxmi