రాంచీ, అక్టోబర్ 22 (హి.స)రాజధాని రాంచీలోని ఖేల్‌గావ్ వద్ద ఉన్న మెగా స్పోర్ట్స్ కాంప్లెక్స్‌లో గురువారం 15వ ఆల్ ఇండియా పోలీస్ ఆర్చరీ ఛాంపియన్‌షిప్ 2026 అత్యంత వైభవంగా ప్రారంభమైంది. ఈ ప్రతిష్టాత్మక జాతీయ క్రీడా పోటీలను ముఖ్య అతిథిగా విచ్చేసిన జార్ఖండ్ గవర్నర్ సంతోష్ కుమార్ గంగ్వార్ జ్యోతి వెలిజించి లాంఛనంగా ప్రారంభించారు. ఈ కార్యక్రమం జాతీయ గీతాలాపనతో ప్రారంభమైంది. ఐదు రోజుల పాటు జరగనున్న ఈ పోటీలలో దేశవ్యాప్తంగా ఉన్న వివిధ పోలీస్ బలగాలకు చెందిన క్రీడాకారులు తమ ప్రతిభను చాటుకోనున్నారు.ఆర్చరీ, పోలీస్ సేవల గుణాలు ఒకేలా ఉంటాయి: గవర్నర్

ఈ ప్రారంభోత్సవ వేడుకనుద్దేశించి గవర్నర్ సంతోష్ కుమార్ గంగ్వార్ మాట్లాడుతూ.. ఆర్చరీ అనేది పూర్తిగా ఏకాగ్రత, ధైర్యం, కచ్చితత్వం మరియు లక్ష్యం పట్ల అంకితభావంతో కూడిన క్రీడ అని పేర్కొన్నారు. పోలీస్ సేవల్లో కూడా ఈ గుణాలు అత్యంత కీలకమైనవని ఆయన నొక్కిచెప్పారు. ఏ పరిస్ధితనైనా సరైన రీతిలో అంచనా వేయడం, విచక్షణతో కూడిన నిర్ణయాలు తీసుకోవడం, విధి నిర్వహణ పట్ల అంకితభావం కలిగి ఉండటం సమర్థవంతమైన పోలీస్ వ్యవస్థకు ప్రధాన ఆధారాలు అని తెలిపారు. పోటీలలో పాల్గొంటున్న క్రీడాకారులందరూ పూర్తి అంకితభావం, క్రమశిక్షణ మరియు క్రీడా స్ఫూర్తితో తమ అత్యుత్తమ ప్రతిభను కనబరచాలని పిలుపునిచ్చారు.

జార్ఖండ్‌ను 'ఆర్చరీ భూమి'గా అభివర్ణించిన గవర్నర్, ఈ రాష్ట్రానికి చెందిన ప్రతిభావంతులు జాతీయ, అంతర్జాతీయ స్థాయిలో అద్భుత విజయాలతో రాష్ట్ర కీర్తి ప్రతిష్టలను ఇనుమడింపజేశారని కొనియాడారు. ప్రధాన మంత్రి నాయకత్వంలో దేశవ్యాప్తంగా క్రీడా సంస్కృతిని ప్రోత్సహించడం, యువతకు తమ ప్రతిభను ప్రదర్శించడానికి తగిన వేదికలను కల్పించడంపై ప్రత్యేక దృష్టి సారించామన్నారు. 'ఖేలో ఇండియా' వంటి కార్యక్రమాలు క్రీడలపై అవగాహన పెంపొందించడంలో, కొత్త ప్రతిభను వెలుగులోకి తీసుకురావడంలో కీలక పాత్ర పోషిస్తున్నాయని పేర్కొన్నారు.

ఆధునిక పోలీస్ వ్యవస్థ, అంతర్గత భద్రత గురించి గవర్నర్ మాట్లాడుతూ.. దేశ అంతర్గత భద్రతా వ్యవస్థకు పోలీస్ బలగాలే వెన్నెముక అని చెప్పారు. శాంతిభద్రతలను పటిష్టంగా కాపాడటం, నేరాలను అరికట్టడం, పౌరుల ప్రాణాలకు, ఆస్తులకు రక్షణ కల్పించడం పోలీసుల అత్యంత ప్రధాన బాధ్యతలు అని అన్నారు. మారుతున్న కాలానికి అనుగుణంగా నేరాల స్వరూపం కూడా వేగంగా మారుతున్నందున, ఆధునిక సాంకేతికత, శాస్త్రీయ పద్ధతులు, సరికొత్త పద్ధతులను సమర్థవంతంగా ఉపయోగించుకోవడం చాలా అవసరమని స్పష్టం చేశారు.

పోలీసు సిబ్బందికి శారీరక దారుఢ్యంతో పాటు మానసిక స్థైర్యం, క్రమశిక్షణ, ఓర్పు, తక్షణ నిర్ణయాలు తీసుకునే సామర్థ్యం ఎంతో అవసరమని గవర్నర్ అన్నారు. క్రమం తప్పకుండా ఆడే క్రీడలు, వ్యాయామాలు శారీరక, మానసిక ఆరోగ్యాన్ని మెరుగుపరచడమే కాకుండా, కష్టకాలంలో సంయమనం, ఆత్మవిశ్వాసం కోల్పోకుండా ఉండటానికి సహాయపడతాయని తెలిపారు. ప్రజలకు, పోలీసులకు మధ్య ఉండే నమ్మకం, పరస్పర సహకారమే సమర్థవంతమైన పోలీస్ వ్యవస్థకు పునాది అని పేర్కొన్నారు.

ఈ జాతీయ స్థాయి పోటీలను నిర్వహించే బాధ్యతను జార్ఖండ్ పోలీస్ శాఖకు అప్పగించడం రాష్ట్రానికి ఎంతో గర్వకారణమని గవర్నర్ అన్నారు. ఆల్ ఇండియా పోలీస్ ఆర్చరీ ఛాంపియన్‌షిప్ వివిధ రాష్ట్రాలు, పోలీస్ బలగాల క్రీడాకారులు తమ ప్రతిభను ప్రదర్శించడానికి, అనుభవాలను పంచుకోవడానికి చక్కటి వేదికగా నిలుస్తుందని తెలిపారు.

హిందూస్తాన్ సమచార్ / Santhosha Laxmi