అనంతపురం , 22 అక్టోబర్ (హి.స.)అనంతపురం జిల్లాలో స్థానిక సంస్థల ఎన్నికల నామినేషన్ల సందర్భంగా ఉద్రిక్తత చోటుచేసుకుంది. అనంతపురం గ్రామీణ ఎంపీడీవో కార్యాలయం వద్ద వైఎస్సార్సీపీ, టీడీపీ నాయకుల మధ్య వివాదం చెలరేగి, చివరకు ఇరువర్గాల మధ్య రాళ్లదాడికి దారితీసింది. ఈ ఘటనతో కార్యాలయం పరిసరాల్లో ఒక్కసారిగా గందరగోళ వాతావరణం నెలకొంది.

కోడిమి, ఇటుకలపల్లి ఎంపీటీసీ నియోజకవర్గాలకు సంబంధించి నామినేషన్లు దాఖలు చేసేందుకు వివిధ పార్టీల అభ్యర్థులు, వారి అనుచరులు ఎంపీడీవో కార్యాలయానికి చేరుకున్నారు. ఈ క్రమంలో ప్రత్యర్థి పార్టీలకు చెందిన నాయకులు, కార్యకర్తల మధ్య మాటామాటా పెరిగింది. తొలుత వాగ్వాదంగా ప్రారంభమైన వివాదం క్రమంగా తీవ్రరూపం దాల్చింది. దీంతో ఇరువర్గాల మధ్య ఘర్షణ జరిగి, పరస్పరం రాళ్లు విసురుకున్నారు.

నామినేషన్ల ప్రక్రియ కొనసాగుతున్న సమయంలో ఈ ఘటన చోటుచేసుకోవడంతో అక్కడికి వచ్చిన అభ్యర్థులు, కార్యకర్తలు ఆందోళనకు గురయ్యారు. కార్యాలయం పరిసరాల్లో ఉద్రిక్త పరిస్థితులు నెలకొనడంతో సాధారణ కార్యకలాపాలకు సైతం అంతరాయం కలిగే పరిస్థితి ఏర్పడింది. ఎన్నికల సమయంలో రాజకీయ పార్టీల మధ్య ఇలాంటి ఘర్షణలు చోటుచేసుకోవడం స్థానికంగా చర్చనీయాంశమైంది.

---------------

హిందూస్తాన్ సమచార్ / పుట్టా సుమన్