హైదరాబాద్ , 07 అక్టోబర్ (హి.స.)హైదరాబాద్ నగర పరిధిలో తాత్కాలిక ప్రకటనలు, హైపర్లోకల్ ప్రకటనలకు తెలంగాణ ప్రభుత్వం కొత్త మార్గదర్శకాలను తీసుకొచ్చింది. CURE ప్రాంతాల్లో ప్రకటనల నిర్వహణకు వార్డు స్థాయిలో అధికారులు బాధ్యత వహించేలా వ్యవస్థను రూపొందించారు. ప్రకటనల కోసం ముందుగా నిర్ణయించిన ప్రదేశాలను గుర్తించి వాటిని అనుమతులతో వినియోగించే విధానం అమల్లోకి రానుంది.

కొత్త విధానం ప్రకారం ప్రతి వార్డులో తాత్కాలిక ప్రకటనలకు 5 నుంచి 10 ప్రదేశాలు, హైపర్లోకల్ ప్రకటనలకు 25 నుంచి 50 ప్రదేశాలను గుర్తించవచ్చు. వీటిని సంబంధిత డిప్యూటీ కమిషనర్ ఆమోదిస్తారు. ప్రకటన స్థలాలను MyCURE లేదా సంబంధిత ప్రకటన యాప్ ద్వారా బుక్ చేసుకునే అవకాశం ఉంటుంది.

అనుమతించిన ప్రకటనలకు QR కోడ్ ఉండాలి. అందులో బుకింగ్ వివరాలు, ప్రింటర్ ఐడీ వంటి సమాచారం పొందుపరచాలి. చెట్లు, వారసత్వ కట్టడాలు, విద్యుత్ స్తంభాలు, ట్రాన్స్ఫార్మర్లు, ఫ్లైఓవర్లు వంటి నిషేధిత ప్రదేశాల్లో ప్రకటనలు ఏర్పాటు చేయడానికి అనుమతి ఉండదు.

ట్రాఫిక్కు, పాదచారుల రాకపోకలకు, ట్రాఫిక్ సిగ్నల్స్కు లేదా CCTV కెమెరాల దృశ్యానికి ఆటంకం కలిగించే ప్రకటనలను కూడా నిషేధించారు. అనధికార ప్రకటనలను మున్సిపల్, పోలీస్ లేదా HYDRAA అధికారులు తొలగించవచ్చు. తొలగింపు ఖర్చుతో పాటు జరిమానాను కూడా సంబంధిత వ్యక్తి నుంచి వసూలు చేసే నిబంధన ఉంది.

తాత్కాలిక ప్రకటనలను గరిష్ఠంగా మూడు రోజులు, హైపర్లోకల్ ప్రకటనలను ఏడు రోజుల వరకు అనుమతించే విధానం తీసుకొచ్చారు. నగర సౌందర్యం, రహదారి భద్రత, అనధికార హోర్డింగ్ల నియంత్రణకు ఈ నిబంధనలు ఉపయోగపడే అవకాశం ఉంది.

---------------

హిందూస్తాన్ సమచార్ / పుట్టా సుమన్