హైదరాబాద్ , 07 అక్టోబర్ (హి.స.)ఖైరతాబాద్ అసెంబ్లీ నియోజకవర్గ ఉపఎన్నికపై తెలంగాణ హైకోర్టులో కీలక పరిణామం చోటుచేసుకుంది. 2023 అసెంబ్లీ ఎన్నికల ఫలితాన్ని సవాల్ చేస్తూ పెండింగ్లో ఉన్న ఎన్నికల పిటిషన్ పరిష్కారం అయ్యే వరకు ఖైరతాబాద్కు ఉపఎన్నిక నిర్వహించేందుకు ముందుకు వెళ్లబోమని ఎన్నికల సంఘం హైకోర్టుకు అఫిడవిట్ సమర్పించింది.

2023 ఎన్నికల్లో దానం నాగేందర్ విజయం సాధించడాన్ని సవాల్ చేస్తూ పి. విజయారెడ్డి ఎన్నికల పిటిషన్ దాఖలు చేశారు. ఎన్నికల అఫిడవిట్లో ఆస్తుల వివరాలకు సంబంధించిన అంశాలను ఆమె ప్రశ్నించినట్లు సమాచారం. ఈ పిటిషన్ ఇంకా పెండింగ్లో ఉన్న నేపథ్యంలో ఉపఎన్నికకు నోటిఫికేషన్ ఇవ్వడం సరికాదని ఆమె తరఫున వాదనలు వినిపించాయి.

ఈ అంశంపై అక్టోబర్ 1న హైకోర్టు విచారణ సందర్భంగా ఎన్నికల సంఘం కూడా పిటిషన్ పరిష్కారం అయ్యే వరకు ఉపఎన్నిక నిర్వహించబోమని మౌఖికంగా తెలిపింది. అనంతరం కోర్టు ఆదేశాల మేరకు ఇప్పుడు అదే విషయాన్ని అధికారికంగా అఫిడవిట్ రూపంలో సమర్పించింది.

ఎన్నికల ప్రక్రియలో ఒక నియోజకవర్గానికి సంబంధించిన గత ఎన్నికల చెల్లుబాటు కోర్టులో సవాల్లో ఉన్నప్పుడు ఉపఎన్నిక నిర్వహించడంపై న్యాయపరమైన సమస్యలు తలెత్తకుండా ఎన్నికల సంఘం ఈ వైఖరి తీసుకున్నట్లు తెలుస్తోంది.

ఈ పరిణామం ఖైరతాబాద్ రాజకీయాలపై ఆసక్తి పెంచింది. ఉపఎన్నిక ఎప్పుడు జరుగుతుందనే అంశం కంటే ముందుగా పెండింగ్ ఎన్నికల పిటిషన్ ఎప్పుడు పరిష్కారం అవుతుందన్నదే ఇప్పుడు కీలకంగా మారింది. కోర్టు తీర్పు, తదనంతర ఎన్నికల సంఘం చర్యల ఆధారంగానే తదుపరి రాజకీయ ప్రక్రియ ముందుకు సాగనుంది.

---------------

హిందూస్తాన్ సమచార్ / పుట్టా సుమన్