న్యూఢిల్లీ, 22 మార్చి (హి.స.)

అమెరికా మాజీ అధ్యక్షుడు డొనాల్డ్ ట్రంప్, ఎఫ్బీఐ (FBI) మాజీ డైరెక్టర్ రాబర్ట్ ముల్లర్ (Robert Mueller) మరణంపై నోరుజారి వివాదాస్పద వ్యాఖ్యలు చేశారు. ఒక దేశాధ్యక్షుడిగా ముల్లర్ మరణవార్తపై సానుభూతి తెలపాల్సింది పోయి, చచ్చాడు.. సంతోషం (Glad he's gone) అనే అర్థం వచ్చేలా ట్రంప్ దురుసుగా మాట్లాడటం రాజకీయ వర్గాల్లో తీవ్ర చర్చకు దారి తీసింది. రాబర్ట్ ముల్లర్ మరణించినట్లు అధికారిక ప్రకటన వెలువడిన కొద్దిసేపటికే, డొనాల్డ్ ట్రంప్ తనదైన శైలిలో స్పందిస్తూ పాత కక్షలను బయటపెట్టుకున్నారు. చివరకు విచారణల పర్వం ముగిసింది.. అతను చనిపోవడం సంతోషకరం అనేలా ట్రంప్ చేసిన వ్యాఖ్యలు అమెరికా రాజకీయాల్లో నైతికతపై పెద్ద ప్రశ్నలను లేవనెత్తుతున్నాయి. 2016 అమెరికా ఎన్నికల్లో రష్యా జోక్యంపై ముల్లర్ నేతృత్వంలో జరిగిన రెండేళ్ల విచారణను ట్రంప్ ఎప్పుడూ అక్రమ విచారణ (Witch Hunt) గా అభివర్ణించేవారు. ఆ కోపాన్ని మనసులో పెట్టుకుని, ఒక వ్యక్తి మరణించినప్పుడు కనీస గౌరవం ఇవ్వకుండా ఇలా బహిరంగంగా వ్యాఖ్యానించడం ట్రంప్ రాజకీయ భవిష్యత్తుపై ప్రభావం చూపవచ్చునని విశ్లేషకులు భావిస్తున్నారు. ముఖ్యంగా ముల్లర్ ఒక వియత్నాం యుద్ధ వీరుడు కావడంతో, సైనిక నేపథ్యం ఉన్న ఓటర్లు ట్రంప్ తీరును తీవ్రంగా తప్పుబడుతున్నారు.

ఈ వ్యాఖ్యల పట్ల డెమొక్రాట్లే కాకుండా, రిపబ్లికన్ పార్టీలోని కొంతమంది సీనియర్ నాయకులు కూడా విస్మయం వ్యక్తం చేస్తున్నారు. ఒక వ్యక్తి మరణాన్ని సంబరంగా జరుపుకోవడం అమెరికన్ సంస్కృతికి విరుద్ధమని, ముల్లర్ తన జీవితాన్ని దేశ సేవకే అంకితం చేశారని పలువురు కొసాడుతున్నారు. గతంలో కూడా ట్రంప్ పలువురు దివంగత నేతలపై ఇలాంటి వ్యాఖ్యలు చేసిన చరిత్ర ఉన్నప్పటికీ, ముల్లర్ విషయంలో ఆయన ప్రదర్శించిన కఠినత్వం ఒక క్రూరమైన రాజకీయ కక్ష సాధింపుగా కనిపిస్తోందని అభిప్రాయపడుతున్నారు. విశ్లేషకులు

ముల్లర్ కుటుంబ సభ్యులు, ఆయన మద్దతుదారులు ట్రంప్ వ్యాఖ్యలను అమానవీయమైనవిగా పేర్కొన్నారు. ఎఫ్బీఐ మాజీ డైరెక్టర్గా ముల్లర్ చేసిన సేవలను దేశం గుర్తుంచుకుంటుందని, ట్రంప్ వ్యాఖ్యలు ఆయన వ్యక్తిత్వాన్ని తగ్గించలేవని వారు స్పష్టం చేశారు. మరోవైపు ట్రంప్ మద్దతుదారులు మాత్రం ఆయన వ్యాఖ్యలను సమర్థిస్తూ, ముల్లర్ విచారణ వల్ల ట్రంప్ వ్యక్తిగతంగా, రాజకీయంగా ఎంతో మానసిక వేదనను అనుభవించారని వాదిస్తున్నారు.

---------------

హిందూస్తాన్ సమచార్ / సంపత్ రావు, జర్నలిస్ట్..