హైదరాబాద్, 21 ఆగస్టు (హి.స.)

సింగరేణి కాలరీస్ కంపెనీ లిమిటెడ్ (SCCL) కార్మికులకు తెలంగాణ ప్రభుత్వం ఇవాళ ఒక తీపి కబురు అందించింది. గడిచిన ఆర్థిక సంవత్సరంలో సంస్థ సాధించిన రికార్డు స్థాయి లాభాలను దృష్టిలో ఉంచుకుని సింగరేణి కార్మికులకు దసరా పండుగ ముందస్తు బోనస్ కింద 35 శాతం లాభాల వాటాను ఇవాళ అధికారికంగా ప్రకటించారు. ఉప ముఖ్యమంత్రి మరియు ఇంధన శాఖ మంత్రి ఈ మేరకు సంబంధించిన ఫైలుపై ఇవాళ మధ్యాహ్నం సచివాలయంలో సంతకం చేశారు.

ఈ నిర్ణయం ద్వారా సంస్థలో పనిచేస్తున్న దాదాపు 42,000 మంది శాశ్వత కార్మికులతో పాటు, వేలాది మంది కాంట్రాక్ట్ కార్మికులకు కూడా లబ్ధి చేకూరనుంది. గత ఏడాదితో పోలిస్తే ఈసారి లాభాల వాటా శాతాన్ని ప్రభుత్వం మరింత పెంచింది. ప్రతి కార్మికుడి ఖాతాలో సగటున రూ. ఒక లక్షకు పైగా బోనస్ నగదు జమ కానుంది. బొగ్గు ఉత్పత్తిలో రాత్రింబగళ్లు శ్రమిస్తున్న కార్మికుల సంక్షేమానికి తమ ప్రభుత్వం కట్టుబడి ఉందని మంత్రి పేర్కొన్నారు. ఈ బోనస్ నిధులను వచ్చే నెల మొదటి వారంలోనే నేరుగా కార్మికుల బ్యాంక్ ఖాతాల్లో జమ చేయాలని సింగరేణి యాజమాన్యానికి ఆదేశాలు జారీ అయ్యాయి. దీంతో సింగరేణి వ్యాప్తంగా కార్మిక వర్గాలలో పండుగ వాతావరణం నెలకొంది.

---------------

హిందూస్తాన్ సమచార్ / Santhosha Laxmi