హైదరాబాద్, 09 ఆగస్టు (హి.స.)

దేశవ్యాప్తంగా రుతుపవనాల ప్రభావంతో భారీ వర్షాలు కురుస్తుండగా, దేశ రాజధాని ఢిల్లీతో పాటు ఉత్తర భారతదేశంలోని పలు రాష్ట్రాలు తీవ్రంగా ప్రభావితమవుతున్నాయి. ఢిల్లీలోని సఫ్దర్‌జంగ్ వాతావరణ కేంద్రం ఈ ఆగస్టు నెలలో మూడవ అత్యధిక వర్షపాతాన్ని నమోదు చేయడం ఇక్కడి వానల తీవ్రతకు అద్దం పడుతోంది. ఎడతెరిపి లేకుండా కురుస్తున్న ఈ వర్షాల కారణంగా రోడ్లన్నీ జలమయమవడంతో వాహనదారులు తీవ్ర ట్రాఫిక్ ఇబ్బందులను ఎదుర్కొంటున్నారు. అధికారులు ముందస్తు జాగ్రత్తగా లోతట్టు ప్రాంతాల ప్రజలను అప్రమత్తం చేసి తగిన చర్యలు తీసుకుంటున్నారు.మరోవైపు ఢిల్లీ పరిసర ప్రాంతాల్లోనూ వానల జోరు కొనసాగుతుండటంతో, హర్యానాలోని కొన్ని జిల్లాలకు భారత వాతావరణ శాఖ (IMD) రెడ్ అలర్ట్ ప్రకటించింది. రాబోయే కొన్ని గంటల్లో మరింత భారీ నుండి అతి భారీ వర్షాలు కురిసే అవకాశం ఉండటంతో ప్రజలు అత్యవసరమైతే తప్ప బయటకు రావద్దని హెచ్చరించారు. నదులు, కాలువలు ఉధృతంగా ప్రవహించే ప్రమాదం ఉన్నందున సహాయక బృందాలను రంగంలోకి దించి పరిస్థితిని నిరంతరం సమీక్షిస్తున్నారు.

---------------

హిందూస్తాన్ సమచార్ / Santhosha Laxmi