హైదరాబాద్, 01 సెప్టెంబర్ (హి.స.)

కృష్ణా జిల్లా విజయవాడ నగర శివారులోని కంకిపాడు మండలం కోమటికుంట వద్ద రాత్రి సమయంలో తీవ్ర ఉద్రిక్తత, కలకలం నెలకొంది. తూర్పుగోదావరి జిల్లాలో పలు తీవ్రమైన నేరాలకు పాల్పడి, పట్టుకోవడానికి వచ్చిన పోలీసులపై దాడి చేసి పరారైన ఒక ప్రమాదకరమైన నిందితుడు (అవినాష్) కోసం పోలీసులు విస్తృత గాలింపు చర్యలు చేపట్టారు. నిందితుడు కంకిపాడు పరిధిలో దాక్కున్నాడనే నమ్మదగిన సమాచారంతో విజయవాడ కమిషనరేట్ పోలీసులు ప్రత్యేక బృందాలతో గాలింపు వేగవంతం చేశారు.

రాత్రి సమయంలో నిందితుడిని పోలీసులు చుట్టుముట్టి లొంగిపోవాలని ఆదేశించగా, అతడు లొంగిపోకుండా తన వద్ద ఉన్న పదునైన కత్తి, రాళ్లతో పోలీసులపై తీవ్రస్థాయిలో దాడికి తెగబడ్డాడు. ఈ అకస్మాత్తు దాడిలో ఒక పోలీస్ కానిస్టేబుల్ ఛాతీ, చేతులకు తీవ్ర గాయాలయ్యాయి. నిందితుడు మరింత ప్రమాదకరంగా మారి మరో పోలీసుపై దాడికి సిద్ధపడటంతో, పరిస్థితి చేయిదాటకుండా కంకిపాడు సీఐ తమ సిబ్బంది ఆత్మరక్షణ కోసం హెచ్చరికగా నిందితుడి కాళ్లపైకి తుపాకీతో కాల్పులు జరిపారు.

కాల్పుల్లో గాయపడిన నిందితుడిని, అలాగే గాయపడిన కానిస్టేబుల్‌ను పోలీసులు వెంటనే విజయవాడ ప్రభుత్వ జనరల్ ఆసుపత్రికి తరలించి చికిత్స అందిస్తున్నారు. ప్రశాంతమైన విజయవాడ నగరంలో శాంతిభద్రతలకు విఘాతం కలిగిస్తే లేదా రౌడీయిజం, చట్టవ్యతిరేక చర్యలకు పాల్పడితే ఎంతటి వారినైనా సహించేది లేదని విజయవాడ పోలీస్ కమిషనర్ ఘాటుగా హెచ్చరించారు. నగర సరిహద్దుల్లో చెక్‌పోస్టులు ఏర్పాటు చేసి నిరంతరం తనిఖీలు నిర్వహిస్తున్నారు.

---------------

హిందూస్తాన్ సమచార్ / Santhosha Laxmi