హైదరాబాద్, 01 సెప్టెంబర్ (హి.స.)
పట్టణ ప్రాంతాల్లో నివసించే పేద, దిగువ మధ్యతరగతి కుటుంబాల సొంత ఇంటి కలను నిజం చేసేందుకు ఆంధ్రప్రదేశ్ ప్రభుత్వం నిశ్చయించుకుంది. 'ప్రధానమంత్రి ఆవాస్ యోజన - అర్బన్ (PMAY-U) 2.0' పథకం కింద తొలి విడతగా రాష్ట్రవ్యాప్తంగా 17,912 నూతన ఇళ్ల నిర్మాణానికి అనుమతులు మంజూరు చేస్తూ పురపాలక, పట్టణాభివృద్ధి శాఖ ఉత్తర్వులు జారీ చేసింది. ఈ పథకం ద్వారా స్వంత స్థలం కలిగి ఉండి ఇల్లు నిర్మించుకోలేని అర్హులైన ప్రతి కుటుంబానికి రూ. 2.89 లక్షల ఆర్థిక సాయాన్ని ప్రభుత్వం అందించనుంది.
గత అనుభవాలను దృష్టిలో ఉంచుకుని, ఎలాంటి దళారుల ప్రమేయం లేకుండా, నిధులు దుర్వినియోగం కాకుండా ఉండేందుకు ప్రభుత్వం అత్యాధునిక సాంకేతిక పరిజ్ఞానాన్ని ఉపయోగిస్తోంది. లబ్ధిదారుల ఎంపిక నుంచి ఇళ్ల నిర్మాణం వరకు ప్రతీ దశను జియో-ట్యాగింగ్, ఆధార్ సీడింగ్ మరియు బయోమెట్రిక్ విధానాల ద్వారా పర్యవేక్షిస్తున్నారు. పునాది దశ, పునాది పైభాగం (ప్లింత్ లెవల్), రూఫ్ లెవల్ మరియు నిర్మాణం పూర్తయిన తర్వాత ప్రతి దశలో ఇళ్ల ఫోటోలను యాప్లో అప్లోడ్ చేసిన వెంటనే నేరుగా లబ్ధిదారుల బ్యాంక్ ఖాతాల్లోనే విడతల వారీగా నగదు జమ అవుతుంది.
పట్టణాల్లో మురికివాడల రహిత సమాజాన్ని నిర్మించడం, పేద ప్రజలకు సురక్షితమైన, గౌరవప్రదమైన పక్కా గృహాలను అందించడమే ఈ పథకం యొక్క ముఖ్య ఉద్దేశం. అర్హత ఉండి ఇంకా దరఖాస్తు చేసుకోని వారు సచివాలయాల ద్వారా అప్లై చేసుకోవచ్చని, మున్సిపల్ అధికారులు త్వరలోనే స్థల పరిశీలన చేసి రెండో విడత జాబితాను విడుదల చేస్తారని ప్రభుత్వం తెలిపింది.
---------------
హిందూస్తాన్ సమచార్ / Santhosha Laxmi
