తిరుమల, 01 సెప్టెంబర్ (హి.స.)

కలియుగ వైకుంఠమైన తిరుమల శ్రీ వేంకటేశ్వర స్వామివారి ఆలయంలో త్వరలో ప్రారంభం కానున్న సాలకట్ల మరియు నవరాత్రి బ్రహ్మోత్సవాలను అత్యంత వైభవంగా నిర్వహించేందుకు తిరుమల తిరుపతి దేవస్థానం (టీటీడీ) పాలకమండలి విస్తృత స్థాయిలో ఏర్పాట్లు చేస్తోంది. ప్రపంచం నలుమూలల నుంచి లక్షలాది మంది భక్తులు స్వామివారి వాహన సేవలను దర్శించుకోవడానికి తిరుమలకు రానుండటంతో, వారి సౌకర్యార్థం సకల వసతులను సిద్ధం చేస్తున్నారు.

బ్రహ్మోత్సవాల్లో అత్యంత ముఖ్యమైన గరుడ సేవ రోజున తిరుమలకు విపరీతమైన భక్తుల రద్దీ నెలకొంటుంది. దీనిని దృష్టిలో ఉంచుకుని నాలుగు మాడ వీధుల్లో గ్యాలరీలను ఆధునీకరించడంతో పాటు, ఎండ, వర్షాల నుంచి రక్షణ పొందేలా జర్మన్ షెడ్లను ఏర్పాటు చేస్తున్నారు. గ్యాలరీల్లో వేచి ఉండే భక్తులకు ఎలాంటి ఇబ్బంది కలగకుండా నిరంతరాయంగా పాలు, మంచినీరు, తాజా అన్నప్రసాదాలు పంపిణీ చేసేందుకు వేలాది మంది శ్రీవారి సేవకులను రంగంలోకి దించుతున్నారు.

అలాగే తిరుమలలోని హోటళ్లు, ఫాస్ట్ ఫుడ్ సెంటర్లు, రెస్టారెంట్లలో భక్తులను దోపిడీ చేయకుండా ఉండేందుకు టీటీడీ ప్రత్యేక తనిఖీ బృందాలను ఏర్పాటు చేసింది. నిర్దేశించిన ధరల పట్టికను బోర్డులపై ప్రదర్శించాలని, పరిశుభ్రమైన, నాణ్యమైన ఆహారాన్ని మాత్రమే విక్రయించాలని ఆదేశించింది. నిబంధనలు ఉల్లంఘించి అధిక ధరలకు తినుబండారాలు విక్రయిస్తే సదరు దుకాణాలను శాశ్వతంగా సీజ్ చేసి భారీ జరిమానాలు విధిస్తామని టీటీడీ ఈఓ హెచ్చరించారు. భక్తులకు ఎలాంటి అసౌకర్యం కలగకుండా వైభవోపేతంగా ఉత్సవాలు నిర్వహిస్తామని తెలిపారు.

---------------

హిందూస్తాన్ సమచార్ / Santhosha Laxmi