హైదరాబాద్ , 19 సెప్టెంబర్ (హి.స.)తెలంగాణలో సెప్టెంబర్ 19 నుంచి 24 వరకు పలు ప్రాంతాల్లో భారీ వర్షాలు కురిసే అవకాశం ఉందని వాతావరణ శాఖకు సంబంధించిన తాజా నివేదికలు వెల్లడించాయి. ముఖ్యంగా పశ్చిమ, దక్షిణ తెలంగాణ జిల్లాల్లో భారీ వర్షాలకు అవకాశం ఉన్నట్లు అంచనా వేయబడింది. హైదరాబాద్ సహా పలు ప్రాంతాల్లో మధ్యాహ్నం లేదా సాయంత్రం సమయంలో ఉరుములు, మెరుపులతో కూడిన వర్షాలు ఏర్పడే పరిస్థితులు ఉన్నాయని వాతావరణ నివేదికలు పేర్కొంటున్నాయి.

సెప్టెంబర్ 19న పాక్షికంగా మేఘావృతమైన ఆకాశంతో పాటు ఒకటి రెండు దఫాల వర్షం లేదా ఉరుములతో కూడిన జల్లులు కురిసే అవకాశం ఉందని పేర్కొంది. సెప్టెంబర్ 20, 21 తేదీల్లో కూడా ఇలాంటి వాతావరణ పరిస్థితులు కొనసాగవచ్చని అంచనా వేసింది. నగరంలో ఉష్ణోగ్రతలు సుమారు 32 నుంచి 34 డిగ్రీల సెల్సియస్ మధ్య ఉండే అవకాశం ఉందని తెలిపింది.

వర్షాల నేపథ్యంలో లోతట్టు ప్రాంతాలు, రోడ్డు పక్కన నీరు నిలిచే ప్రాంతాలు, నిర్మాణ ప్రాంతాల్లో ప్రజలు అప్రమత్తంగా ఉండాల్సిన అవసరం ఉంది. హైదరాబాద్లో కొద్దిసేపు కురిసే భారీ వర్షం కూడా ట్రాఫిక్పై ప్రభావం చూపే అవకాశం ఉండటంతో వాహనదారులు జాగ్రత్తలు తీసుకోవాల్సి ఉంటుంది.

---------------

హిందూస్తాన్ సమచార్ / పుట్టా సుమన్