తిరుపతి , 30 సెప్టెంబర్ (హి.స.)

దేశ ప్రధాని నరేంద్ర మోదీ ప్రజా జీవితంలోకి వచ్చి, వివిధ హోదాల్లో దేశానికి సేవనందిస్తూ 25 ఏళ్లు పూర్తి చేసుకున్న సందర్భంగా ఆంధ్రప్రదేశ్‌లో కూటమి పార్టీల ఆధ్వర్యంలో ప్రత్యేక వేడుకలు, కార్యక్రమాలు నిర్వహిస్తున్నారు. ఇందులో భాగంగానే తిరుపతి పుణ్యక్షేత్రం అలిపిరి పాదాల వద్ద నుంచి ఉత్తరప్రదేశ్‌లోని పవిత్ర కాశీ (వారణాసి) వరకు ఒక ప్రత్యేక బైక్ యాత్ర అట్టహాసంగా ప్రారంభమైంది.

తెలుగుదేశం పార్టీ రాష్ట్ర అధ్యక్షుడు, ఎమ్మెల్యే పల్లా శ్రీనివాసరావు ఈ బైక్ యాత్రను జెండా ఊపి ప్రారంభించారు. ప్రజా నాయకుడిగా నరేంద్ర మోదీ సాధించిన విజయాలు, దేశాభివృద్ధికి ఆయన చేపట్టిన సంస్కరణలు, పాలనా దక్షతను ప్రజల్లోకి తీసుకువెళ్లే లక్ష్యంతో ఈ యాత్రను రూపొందించారు. తిరుపతి నుంచి ప్రారంభమైన ఈ బైక్ యాత్ర వివిధ రాష్ట్రాల మీదుగా సాగుతూ కాశీకి చేరుకోనుంది. ఈ యాత్రలో కూటమి పార్టీల శ్రేణులు, యువత, మోదీ అభిమానులు పెద్ద ఎత్తున ఉత్సాహంగా పాల్గొంటున్నారు. దేశ సమైక్యతను, ఆధ్యాత్మిక-సాంస్కృతిక వారసత్వాన్ని చాటిచెప్పేలా సాగుతున్న ఈ బైక్ యాత్ర రాజకీయ వర్గాల్లో విశేష ఆకర్షణగా నిలిచింది.

---------------

హిందూస్తాన్ సమచార్ / Santhosha Laxmi