హైదరాబాద్, 30 సెప్టెంబర్ (హి.స.)

తెలుగు రాష్ట్రాల్లో తీవ్ర సంచలనం రేపిన మాజీ మంత్రి వైఎస్ వివేకానంద రెడ్డి హత్య కేసు దర్యాప్తులో ఎన్‌ఫోర్స్‌మెంట్ డైరెక్టరేట్ (ED) విచారణను మరింత వేగవంతం చేసింది. ఈ కేసులో మనీలాండరింగ్ కోణాన్ని వెలికితీసేందుకు అధికారులు వరుస విచారణలు జరుపుతున్నారు. ఇందులో భాగంగానే ఈ హత్య కేసులో ఏ-3 (మూడో నిందితుడు) గా ఉన్న ఉమాశంకర్ రెడ్డి రెండో రోజు ఈడీ అధికారుల ఎదుట విచారణకు హాజరయ్యారు.

హైదరాబాద్‌లోని ఈడీ ప్రాంతీయ కార్యాలయంలో ఈ విచారణ కొనసాగుతోంది. వివేకానంద రెడ్డి హత్యకు ముందు మరియు ఆ తర్వాత జరిగిన ఆర్థిక లావాదేవీలపై అధికారులు ఉమాశంకర్ రెడ్డిని సుదీర్ఘంగా ప్రశ్నిస్తున్నారు. ముఖ్యంగా 2019 నాటి నుంచి ఆయనకు సంబంధించిన వివిధ బ్యాంకు ఖాతాలు, అనుమానాస్పద లావాదేవీల రికార్డులను ఈడీ అధికారులు పరిశీలిస్తున్నారు.

ఈ హత్యోదంతం వెనుక పెద్దఎత్తున ఆర్థిక లావాదేవీలు జరిగినట్లు వస్తున్న ఆరోపణలు, ప్రధానంగా సుమారు రూ. 40 కోట్ల డీల్‌కు సంబంధించిన ప్రస్తావనపై అధికారులు తీవ్రంగా ఆరా తీస్తున్నట్లు సమాచారం. ఈ కేసులో ముడుపులు, హవాలా మార్గాలు మరియు ఆర్థిక కుట్ర కోణాలపై స్పష్టత తెచ్చేందుకు ఉమాశంకర్ రెడ్డిని ప్రశ్నించడం ద్వారా మరిన్ని కీలక వివరాలు రాబట్టే పనిలో ఈడీ నిమగ్నమైంది. ఈ విచారణ తెలుగు రాజకీయ వర్గాల్లో తీవ్ర చర్చనీయాంశంగా మారింది.

---------------

హిందూస్తాన్ సమచార్ / Santhosha Laxmi