దిల్లీ:, 6 మార్చి (హి.స.) గగనతలంలో అత్యంత ఎత్తుకు వెళ్లే యుద్ధ విమానాల్లో పైలట్లు ఆక్సిజన్‌ కోసం సంప్రదాయ సిలిండర్లపై ఆధారపడడాన్ని తగ్గించి...లోహ విహంగంలోనే ప్రాణవాయువును ఉత్పత్తి చేసే వ్యవస్థ(ఓబీఓజీఎస్‌)ను రక్షణ పరిశోధన, అభివృద్ధి సంస్థ (డీఆరోడీవో) సొంతంగా రూపొందించింది.

ఓబీఓజీఎస్‌ పనితీరును ఈ నెల 4న తేజస్‌ యుద్ధ విమానాల్లో పరీక్షించగా విజయవంతమైందని రక్షణ మంత్రిత్వ శాఖ బుధవారం వెల్లడించింది. కొన్ని మార్పులు చేర్పులతో ఓబీఓజీఎస్‌ను మిగ్‌-29కె, ఇతర యుద్ధ విమానాల్లోనూ ప్రవేశపెడతామని తెలిపింది. సముద్ర మట్టం నుంచి 50వేల అడుగుల ఎత్తు, అంతకంటే దిగువ స్థాయిల్లోనూ గగనతల విన్యాసాలు నిర్వహించి ఓబీఓజీఎస్‌ను పరీక్షించగా అన్ని పరామితుల్లోనూ ఈ వ్యవస్థ సఫలతను సాధించిందని రక్షణ శాఖ వెల్లడించింది.

---------------

హిందూస్తాన్ సమచార్ / నాగరాజ్ రావు