ప్రయాగ్‌రాజ్‌ , 9 మార్చి (హి.స.)ఉత్తర్‌ప్రదేశ్‌లోని త్రివేణీసంగమంలో 45 రోజులపాటు కొనసాగి ఇటీవల ముగిసిన మహాకుంభ మేళా పింటూ మహరా (45) అనే పడవల యజమానికి ఏకంగా రూ.30 కోట్ల రాబడిని తెచ్చిపెట్టింది. స్వయానా రాష్ట్ర ముఖ్యమంత్రి యోగి ఆదిత్యనాథ్‌ అసెంబ్లీ వేదికగా ఈ విషయాన్ని వెల్లడించడంతో పింటూ విజయగాథ చర్చనీయాంశంగా మారింది. మేళాకు కోట్ల సంఖ్యలో భక్తులు తరలివస్తారన్న విషయాన్ని ముందే పసిగట్టి.. తన వద్ద ఉన్న పడవల సంఖ్యను 60 నుంచి 130కు పెంచుకోవడం పింటూ తీసుకొన్న సాహసోపేతమైన నిర్ణయమని దీనిపై ప్రభుత్వం ఓ ప్రకటన విడుదల చేసింది. ఇందుకోసం ఆయన కుటుంబం ఇంట్లోని బంగారాన్ని తాకట్టు పెట్టడంతోపాటు బయట రుణాలు కూడా తీసుకొని అవిశ్రాంతంగా శ్రమించింది. 2019లో జరిగిన అర్ధ కుంభమేళా భక్తుల తాకిడిని స్వయంగా చూసిన అనుభవంతో పింటూ ఈ సారి తన వ్యాపారాన్ని ముందస్తుగా విస్తరించడంలో జాగ్రత్త పడ్డారు. 130 పడవలను నడిపేందుకు ఆయన 300 మంది యువతకు ఉపాధి కల్పించారు.

---------------

హిందూస్తాన్ సమచార్ / నాగరాజ్ రావు