అమరావతి , 13 అక్టోబర్ (హి.స.)భారత రాష్ట్రపతి ద్రౌపది ముర్ము అక్టోబర్ 14, 15 తేదీల్లో విజయవాడలో పర్యటించనున్న నేపథ్యంలో ఆంధ్రప్రదేశ్ ప్రభుత్వం ఏర్పాట్లను ముమ్మరం చేసింది. రాష్ట్రపతి పర్యటనలో భాగంగా ఇంద్రకీలాద్రిపై కొలువైన శ్రీ కనకదుర్గమ్మను దర్శించుకోవడంతో పాటు, గ్రామీణ మహిళల ఉత్పత్తులకు ప్రాధాన్యం ఇచ్చే జాతీయ సరస్ మేళాలో పాల్గొననున్నారు.

రాష్ట్ర ప్రభుత్వ ప్రధాన కార్యదర్శి జి. సాయి ప్రసాద్ ఈ పర్యటనకు సంబంధించి వివిధ శాఖల అధికారులతో సమన్వయ సమావేశం నిర్వహించారు. రాష్ట్రపతి కార్యాలయం నుంచి జారీ చేసిన ప్రోటోకాల్ మార్గదర్శకాలను కచ్చితంగా పాటించాలని అధికారులకు సూచించారు.

భద్రత, రవాణా, ట్రాఫిక్ నియంత్రణ, కార్యక్రమాల నిర్వహణ, అత్యవసర సేవలు వంటి అంశాలపై ప్రత్యేక దృష్టి పెట్టాలని ఆదేశించారు.

ప్రకటించిన ప్రాథమిక షెడ్యూల్ ప్రకారం, రాష్ట్రపతి అక్టోబర్ 14న సాయంత్రం గన్నవరం విమానాశ్రయానికి చేరుకుంటారు. అక్కడి నుంచి రోడ్డు మార్గంలో విజయవాడలోని ఇంద్రకీలాద్రికి వెళ్లి శరన్నవరాత్రి ఉత్సవాల సందర్భంగా కనకదుర్గమ్మను దర్శించుకుంటారు. అనంతరం విజయవాడలోనే రాత్రి బస చేస్తారు.

అక్టోబర్ 15న పున్నమి ఘాట్లో నిర్వహించనున్న జాతీయ సరస్ మేళాకు రాష్ట్రపతి ముఖ్య అతిథిగా హాజరవుతారు. కార్యక్రమం అనంతరం స్వయం సహాయక సంఘాల సభ్యులు, 'లఖ్పతి దీదీ'లతో రాష్ట్రపతి ముఖాముఖి కార్యక్రమంలో పాల్గొనే షెడ్యూల్ కూడా ఉంది.

రాష్ట్రపతి పర్యటన నేపథ్యంలో ప్రజలకు అసౌకర్యం కలగకుండా ట్రాఫిక్ నిర్వహణ చేపట్టడం, భద్రతా ఏర్పాట్లు సమర్థంగా అమలు చేయడం అధికారులకు ముఖ్యమైన బాధ్యతగా భావిస్తున్నారు.

---------------

హిందూస్తాన్ సమచార్ / పుట్టా సుమన్