అమరావతి , 30 అక్టోబర్ (హి.స.)

ఆంధ్రప్రదేశ్లో స్థానిక సంస్థల ఎన్నికల్లో పోటీ చేస్తున్న అభ్యర్థులకు సంబంధించిన వివరాలను ప్రజలకు అందుబాటులో ఉంచేందుకు రాష్ట్ర ఎన్నికల సంఘం (SEC) కీలక నిర్ణయం తీసుకుంది. అభ్యర్థులు ఎన్నికల సమయంలో సమర్పించిన నామినేషన్ పత్రాలు, అఫిడవిట్లను ఆన్లైన్లో అందుబాటులో ఉంచనున్నట్లు హైకోర్టుకు వెల్లడించింది. ఇందుకోసం SEC అధికారిక వెబ్సైట్లో ప్రత్యేక పోర్టల్ను ఏర్పాటు చేసినట్లు తెలిపింది.

ఎన్నికల్లో పోటీ చేసే అభ్యర్థులు తమ ఆస్తులు, అప్పులు, విద్యార్హతలు, ఇతర సంబంధిత వివరాలను అఫిడవిట్లలో పొందుపరుస్తారు. ఈ సమాచారాన్ని ఆన్లైన్లో అందుబాటులోకి తీసుకురావడం ద్వారా ఓటర్లు తమ ప్రాంతం నుంచి బరిలో ఉన్న అభ్యర్థుల వివరాలను సులభంగా తెలుసుకునే అవకాశం కలుగుతుంది. ఈ మేరకు అభ్యర్థుల నామినేషన్ పత్రాలు, అఫిడవిట్లను ప్రత్యేక పోర్టల్లో అప్లోడ్ చేయాలని సంబంధిత అధికారులకు ఎన్నికల సంఘం ఆదేశాలు జారీ చేసింది.

ఈ నిర్ణయంతో ఎన్నికల ప్రక్రియలో పారదర్శకత మరింత పెరుగుతుందని భావిస్తున్నారు. అభ్యర్థుల నేపథ్యం, ఆర్థిక వివరాలపై ఓటర్లు అవగాహన పెంచుకుని తమ ఓటు హక్కును వినియోగించుకోవడానికి ఈ ఆన్లైన్ విధానం ఉపయోగపడనుంది.

---------------

హిందూస్తాన్ సమచార్ / పుట్టా సుమన్