హైదరాబాద్ , 30 అక్టోబర్ (హి.స.)
దేశ రాజధాని న్యూఢిల్లీలో ఇండియా కూటమి (INDIA bloc) ఆధ్వర్యంలో తలపెట్టిన 'ఓటు బచావో, దేశ్ బచావో' మహా ర్యాలీకి తెలంగాణ నుంచి కాంగ్రెస్ శ్రేణులను తరలించేందుకు తెలంగాణ రాష్ట్ర కాంగ్రెస్ కమిటీ (TPCC) విస్తృత ఏర్పాట్లు చేసింది. నవంబర్ 1న నిర్వహించనున్న ఈ సభకు తెలంగాణ వ్యాప్తంగా దాదాపు 10,000 నుండి 15,000 మంది కార్యకర్తలు, నాయకులను తీసుకెళ్లేందుకు ముందుగా దక్షిణ మధ్య రైల్వే (SCR) వద్ద ప్రత్యేక రైళ్ల (Special Trains) కోసం కాంగ్రెస్ దరఖాస్తు చేసుకుంది. అయితే చివరి క్షణంలో రైల్వే శాఖ ప్రత్యేక రైళ్లకు అనుమతి నిరాకరించడంతో ప్రత్యామ్నాయంగా 100కు పైగా ప్రైవేట్ స్లీపర్ బస్సులను కాంగ్రెస్ నాయకత్వం సిద్ధం చేసింది.
ఓటర్ల జాబితాల ప్రత్యేక సమగ్ర సవరణ (SIR) ప్రక్రియలో అక్రమాలు జరుగుతున్నాయని, అర్హులైన ఓటర్ల పేర్లను తొలగిస్తున్నారని ఆరోపిస్తూ కేంద్ర ప్రభుత్వ విధానాలకు వ్యతిరేకంగా ఈ నిరసన కార్యక్రమాన్ని నిర్వహిస్తున్నారు. రైల్వే శాఖ అనుమతి ఇవ్వకపోవడంపై కాంగ్రెస్ నాయకులు తీవ్ర అభ్యంతరం వ్యక్తం చేశారు; ప్రతిపక్షాల నిరసనను అణచివేయడానికే కేంద్రం ఇలాంటి నిర్ణయాలు తీసుకుంటోందని విమర్శించారు. అయినప్పటికీ, ఏర్పాటు చేసిన బస్సుల ద్వారా వేలాది మంది కార్యకర్తలు ఢిల్లీకి తరలివెళ్తారని టీపీసీసీ వర్గాలు స్పష్టం చేశాయి.
---------------
హిందూస్తాన్ సమచార్ / పుట్టా సుమన్
