అమరావతి , 04 అక్టోబర్ (హి.స.)అల్లూరి సీతారామరాజు జిల్లాలో రవాణా మౌలిక వసతులను మార్చే అవకాశం ఉన్న కొత్త గ్రీన్ఫీల్డ్ హైవేకు కేంద్రం, రాష్ట్ర ప్రభుత్వం ఆమోదం తెలిపింది. ఖరగ్పూర్ నుంచి విజయవాడ వరకు ప్రతిపాదించిన విస్తృత హైవే కారిడార్లో భాగంగా ఈ రహదారి ఆంధ్రప్రదేశ్లోని అల్లూరి జిల్లాలో 128 గ్రామాల పరిధిని తాకనుంది.

కొత్త గ్రీన్ఫీల్డ్ హైవే అంటే ఇప్పటికే ఉన్న రహదారిని విస్తరించడం కాకుండా, కొత్త మార్గంలో పూర్తిస్థాయి రహదారి నిర్మాణాన్ని చేపట్టడం. అందువల్ల సరైన మార్గ నిర్ధారణ, భూసేకరణ, పర్యావరణ అనుమతులు, అటవీ ప్రాంతాల అంశాలు, స్థానిక గ్రామాల అవసరాలను పరిగణనలోకి తీసుకోవడం కీలకం కానుంది.

కొత్త రహదారి నిర్మాణం పూర్తయితే ప్రస్తుతం అనేక ప్రాంతాల్లో ఉన్న రవాణా సమస్యలు తగ్గే అవకాశం ఉంది. వ్యవసాయ ఉత్పత్తులు, అటవీ ఆధారిత ఉత్పత్తులు, పర్యాటక ప్రాంతాలకు రవాణా సౌకర్యం మెరుగుపడవచ్చు. పాడేరు పరిధిలోని ప్రాంతాల్లో ఈ ప్రాజెక్టు ప్రభావం ఎక్కువగా ఉండే అవకాశం ఉంది. కేంద్ర, రాష్ట్ర ప్రభుత్వాలు ఇప్పుడు డీటైల్డ్ ప్రాజెక్ట్ రిపోర్ట్ తయారు చేసి, తదుపరి భూసేకరణ ప్రక్రియను ప్రారంభించాల్సి ఉంది.

హైవే నిర్మాణం ద్వారా కేవలం రవాణా సమయం తగ్గడమే కాకుండా, కొత్త ఆర్థిక కార్యకలాపాలు ఏర్పడే అవకాశం ఉంది. రహదారి వెంట లాజిస్టిక్స్ కేంద్రాలు, గిడ్డంగులు, చిన్న పరిశ్రమలు, సేవా రంగ సంస్థలు ఏర్పడితే స్థానిక యువతకు ఉపాధి అవకాశాలు పెరగవచ్చు.

---------------

హిందూస్తాన్ సమచార్ / పుట్టా సుమన్