అమరావతి , 06 అక్టోబర్ (హి.స.)తెలంగాణలో అక్టోబర్ నెలలో సాధారణంగా వర్షాలు కొనసాగాల్సిన సమయంలో పలు ప్రాంతాల్లో పొడి వాతావరణం, అధిక ఉష్ణోగ్రతలు నమోదయ్యే పరిస్థితి కనిపిస్తోంది. అక్టోబర్ 6న రాష్ట్రంలో ప్రధానంగా పొడి వాతావరణం కొనసాగుతుందని వాతావరణ అంచనాలు సూచిస్తున్నాయి. పలు ప్రాంతాల్లో పగటి ఉష్ణోగ్రతలు 35 నుంచి 36 డిగ్రీల సెల్సియస్ లేదా అంతకంటే ఎక్కువగా నమోదయ్యే అవకాశం ఉంది.

హైదరాబాద్ సహా రాష్ట్రంలోని ఎక్కువ ప్రాంతాల్లో పెద్దగా వర్ష సూచన లేదు.

ఉదయం, రాత్రి వేళల్లో వాతావరణం కొంత చల్లగా ఉన్నప్పటికీ మధ్యాహ్నం వేళ వేడి తీవ్రత పెరగవచ్చని అధికారులు సూచిస్తున్నారు. అయితే అక్టోబర్ 7న తూర్పు తెలంగాణలోని కొన్ని ప్రాంతాల్లో చెదురుమదురు వర్షాలు కురిసే అవకాశం ఉంది. ఖమ్మం, భద్రాద్రి కొత్తగూడెం, నల్గొండ, కుమ్రం భీం ఆసిఫాబాద్, మంచిర్యాల, ములుగు, యాదాద్రి భువనగిరి జిల్లాల్లో అక్కడక్కడా వర్షాలు పడే అవకాశం ఉందని వాతావరణ అంచనాలు చెబుతున్నాయి.

వర్షాల లోటు ఇప్పటికే రాష్ట్రంలోని నీటి వనరులు, వ్యవసాయం, విద్యుత్ రంగాలపై ప్రభావం చూపుతోంది. జలాశయాల్లో నీటి లభ్యత తగ్గడం వల్ల జలవిద్యుత్ ఉత్పత్తి తగ్గిందని ప్రభుత్వం చెబుతోంది. అదే సమయంలో హైదరాబాద్కు తాగునీటి సరఫరాపైనా ఆందోళనలు పెరుగుతున్నాయి. నగరానికి ప్రధాన నీటి వనరుల్లో కొన్ని జలాశయాల్లో నీటి మట్టాలు తగ్గుతున్నాయి.

---------------

హిందూస్తాన్ సమచార్ / పుట్టా సుమన్