అమరావతి , 08 అక్టోబర్ (హి.స.)రాష్ట్ర ప్రభుత్వం నిర్వహించిన విశాఖ పెట్టుబడుల సదస్సులో మొత్తం 31 ఒప్పందాలు కుదిరాయి. వీటి విలువ సుమారు రూ.21,498 కోట్లు కాగా, ప్రాజెక్టుల గ్రౌండింగ్, ఇతర పెట్టుబడి ప్రతిపాదనలను కలిపి మొత్తం పెట్టుబడి ఆకర్షణ రూ.25 వేల కోట్లకు పైగా ఉన్నట్లు ప్రభుత్వం వెల్లడించింది. ఈ ఒప్పందాల ద్వారా దాదాపు 57 వేల ఉద్యోగ అవకాశాలు ఏర్పడే అవకాశం ఉందని అధికారులు తెలిపారు.

ఈ సమావేశం నవంబర్లో విశాఖపట్నంలో జరగనున్న 31వ CII పార్ట్నర్షిప్ సమ్మిట్కు ముందు నిర్వహించిన ప్రాంతీయ కార్యక్రమాల్లో మొదటిది. రాష్ట్రంలోని వివిధ ప్రాంతాల్లో మరో నాలుగు ప్రాంతీయ పెట్టుబడి సమావేశాలు నిర్వహించేందుకు ప్రభుత్వం ప్రణాళిక రూపొందించింది.

విశాఖపట్నాన్ని ఆర్థిక కార్యకలాపాలకు ప్రధాన కేంద్రంగా తీర్చిదిద్దాలన్న రాష్ట్ర ప్రభుత్వ వ్యూహానికి ఈ పెట్టుబడులు ప్రాధాన్యం కలిగిస్తున్నాయి. పోర్టు, విమానాశ్రయం, పారిశ్రామిక కారిడార్లు, ఐటీ రంగం, పర్యాటకం వంటి అనేక రంగాల్లో విశాఖకు ఉన్న అవకాశాలను పెట్టుబడిదారులకు వివరించారు.

ఈ సదస్సులో ఇప్పటికే కుదిరిన పెట్టుబడి ఒప్పందాలను కేవలం పత్రాలకే పరిమితం చేయకుండా వాస్తవ ప్రాజెక్టులుగా మార్చాల్సిన అవసరాన్ని ప్రభుత్వం స్పష్టం చేసింది. గతంలో అనేక పెట్టుబడి ఒప్పందాలు కుదిరినా అవి భూమిపై ప్రాజెక్టులుగా మారడంలో ఆలస్యం జరిగిందన్న విమర్శల నేపథ్యంలో ఈసారి ప్రాజెక్టుల అమలుపై ప్రత్యేక పర్యవేక్షణ చేపడుతున్నారు.

---------------

హిందూస్తాన్ సమచార్ / పుట్టా సుమన్