హైదరాబాద్ , 08 అక్టోబర్ (హి.స.)ములుగు జిల్లాలో గురువారం జరిగిన రోడ్డు ప్రమాదం విషాదాన్ని మిగిల్చింది. ఇసుక లోడ్తో వెళ్తున్న లారీ అదుపు తప్పి CRPF సిబ్బంది ప్రయాణిస్తున్న DCM వాహనాన్ని ఢీకొట్టింది. NH-163పై పసర ఫారెస్ట్ చెక్పోస్ట్ సమీపంలో ఈ ప్రమాదం చోటుచేసుకుంది. ఈ ఘటనలో 39వ బెటాలియన్కు చెందిన CRPF జవాన్ ముఘురం రామకాంత్ అక్కడికక్కడే మృతి చెందగా, మరో ముగ్గురు CRPF సిబ్బంది గాయపడ్డారు.
ప్రమాదానికి సంబంధించిన ప్రాథమిక సమాచారం ప్రకారం ఇసుకతో వెళ్తున్న లారీ అదుపు తప్పడంతో ఎదురుగా లేదా సమీపంలో వెళ్తున్న DCM వాహనాన్ని ఢీకొట్టింది. CRPF సిబ్బంది ప్రయాణిస్తున్న వాహనం ప్రమాదానికి గురైన తర్వాత వెనుక వస్తున్న మరో కారును కూడా లారీ ఢీకొట్టినట్లు సమాచారం. దీంతో మరికొందరు ప్రభుత్వ ఉద్యోగులు కూడా గాయపడ్డారు. గాయపడిన వారిని సమీపంలోని ఆసుపత్రులకు తరలించి చికిత్స అందించారు.
మృతి చెందిన రామకాంత్ వయసు 36 సంవత్సరాలు. ప్రమాదం జరిగిన వెంటనే సహాయక చర్యలు ప్రారంభించారు. రహదారిపై ప్రమాదం కారణంగా కొంతసేపు వాహనాల రాకపోకలకు ఇబ్బంది ఏర్పడింది. పోలీసులు సంఘటనా స్థలానికి చేరుకుని పరిస్థితిని పరిశీలించారు. కేసు నమోదు చేసుకుని దర్యాప్తు చేపట్టారు.
---------------
హిందూస్తాన్ సమచార్ / పుట్టా సుమన్
