హైదరాబాద్, 11 నవంబర్ (హి.స.)

బుధవారం ఉదయం దేశీయ స్టాక్ మార్కెట్లు లాభాలతో ప్రారంభమయ్యాయి. ట్రేడింగ్ మొదలైన కొద్దిసేపటికే మదుపరులు పెద్ద ఎత్తున కొనుగోళ్లకు దిగడంతో సూచీలు గణనీయంగా ఎగబాకాయి. ఉదయం 9:22 గంటల ప్రాంతంలో బీఎస్ఈ సెన్సెక్స్ 1,224 పాయింట్లు ఎగసి 82,324 స్థాయిలో కొనసాగగా, ఎన్ఎస్ఈ నిఫ్టీ 328 పాయింట్లు పెరిగి 25,371 వద్ద ట్రేడ్ అయింది. గత సెషన్లతో పోలిస్తే ఈసారి కొనుగోళ్ల జోరు స్పష్టంగా కనిపించడం మార్కెట్లో సానుకూల వాతావరణం నెలకొందనడానికి సంకేతంగా నిలిచింది. అయితే అమెరికా మార్కెట్లు మాత్రం మునుపటి సెషన్లో నష్టాలతో ముగిశాయి. ఎస్ అండ్ పీ 500 సూచీ 0.38 శాతం, టెక్ రంగ సూచీ నాస్ డాక్ 0.74 శాతం తగ్గింది. అంతర్జాతీయంగా ఇలాంటి పరిస్థితులు ఉన్నప్పటికీ దేశీయ సూచీలు మాత్రం లాభాల బాటలోనే ముందుకు సాగడం విశేషం. ఇదే సమయంలో ప్రపంచ మార్కెట్ పరిణామాలపై మదుపరులు దృష్టి సారించారు. అమెరికా డాలర్ ఇండెక్స్ 102.22 వద్ద కొనసాగగా, బ్రెంట్ ముడిచమురు బ్యారెల్ ధర 92.52 డాలర్లుగా నమోదైంది. అమెరికా పదేళ్ల బాండ్ ఈల్డ్ 5 శాతానికి చేరింది.

---------------

హిందూస్తాన్ సమచార్ / సంపత్ రావు, జర్నలిస్ట్..