న్యూఢిల్లీ, 12 నవంబర్ (హి.స.)

భారత్ మరియు యునైటెడ్ కింగ్‌డమ్ (UK) మధ్య కుదిరిన సమగ్ర ఆర్థిక మరియు వాణిజ్య ఒప్పందం (CETA) అమలులో భాగంగా కేంద్ర వాణిజ్య, పరిశ్రమల మంత్రిత్వ శాఖ పరిధిలోని డైరెక్టరేట్ జనరల్ ఆఫ్ ఫారిన్ ట్రేడ్ (DGFT) కీలక ప్రక్రియను వేగవంతం చేసింది.2027 క్యాలెండర్ సంవత్సరానికి గాను యూకే నుంచి రాయితీ సుంకాలతో 27,250 వాహనాలను దిగుమతి చేసుకునేందుకు ఉద్దేశించిన టారిఫ్ రేట్ కోటా (TRQ) దరఖాస్తుల స్వీకరణ ప్రస్తుతం కొనసాగుతోంది.నవంబర్ 21వ తేదీ వరకు ఆన్‌లైన్ ద్వారా దరఖాస్తు చేసుకునేందుకు ఆటోమొబైల్ తయారీ సంస్థలు, అధీకృత డీలర్లకు అవకాశం కల్పించారు.ఈ మొత్తం కోటాలో పూర్తిగా నిర్మించిన ప్యాసింజర్ కార్ల (CBU) విభాగంలో 1500 సీసీ లోపు ఇంజిన్ సామర్థ్యం గల కార్లకు 6,000 యూనిట్లు, 1500 సీసీ నుంచి 3000 సీసీ మధ్య ఉన్న పెట్రోల్ మరియు 2500 సీసీ లోపు డీజిల్ కార్లకు మరో 6,000 యూనిట్లు కేటాయించారు.అలాగే 3000 సీసీ కంటే ఎక్కువ సామర్థ్యం గల లగ్జరీ పెట్రోల్ కార్లు, 2500 సీసీ కంటే ఎక్కువ సామర్థ్యం గల డీజిల్ కార్లకు అత్యధికంగా 12,500 యూనిట్ల కోటాను నిర్ణయించారు.వీటితో పాటు ఎలక్ట్రిక్ మరియు హైడ్రోజన్ వాహనాలు మినహా ఇతర గూడ్స్ వాహనాలకు 2,750 యూనిట్ల కోటాను కేటాయించారు.ఈ ఒప్పందం ద్వారా దిగుమతిదారులకు లభించే కస్టమ్స్ సుంకం రాయితీ ప్రయోజనాలను అంతిమ వినియోగదారులకు బదిలీ చేయాలని ప్రభుత్వం స్పష్టమైన మార్గదర్శకాలు జారీ చేసింది.

---------------

హిందూస్తాన్ సమచార్ / Santhosha Laxmi