దేశంలోనే తొలి స్వదేశీ హెచ్5ఎన్1 (H5N1) బర్డ్ ఫ్లూ వ్యాక్సిన్ను నేడు జాతికి అంకితం చేయనున్న కేంద్ర మంత్రి శివరాజ్ సింగ్ చౌహాన్
దేశంలోనే తొలి స్వదేశీ హెచ్5ఎన్1 (H5N1) బర్డ్ ఫ్లూ వ్యాక్సిన్ను నేడు జాతికి అంకితం చేయనున్న కేంద్ర మంత్రి శివరాజ్ సింగ్ చౌహాన్
shivaraj


న్యూఢిల్లీ, 20 నవంబర్ (హి.స.)

పౌల్ట్రీ రంగానికి పెను సవాలుగా మారిన బర్డ్ ఫ్లూ (H5N1 ఏవియన్ ఇన్‌ఫ్లుయెంజా) వ్యాధిని నివారించేందుకు భారత్ రూపొందించిన మొట్టమొదటి స్వదేశీ వ్యాక్సిన్‌ను కేంద్ర వ్యవసాయ, రైతు సంక్షేమ శాఖ మంత్రి శివరాజ్ సింగ్ చౌహాన్ నేడు జాతికి అంకితం చేయనున్నారు. భారతీయ శాస్త్రవేత్తలు పూర్తి స్వదేశీ పరిజ్ఞానంతో అభివృద్ధి చేసిన ఈ వ్యాక్సిన్ అందుబాటులోకి రావడం దేశ పౌల్ట్రీ పరిశ్రమకు ఒక చారిత్రాత్మక మైలురాయిగా నిలవనుంది.

ఇప్పటివరకు బర్డ్ ఫ్లూ ప్రబలినప్పుడల్లా లక్షలాది కోళ్లను చంపివేయాల్సి (Culling) రావడంతో కోళ్ల పరిశ్రమ, రైతులు తీవ్ర ఆర్థిక నష్టాలను ఎదుర్కొంటున్నారు. ఈ సమస్యకు శాశ్వత పరిష్కారం చూపే దిశగా భారత వ్యవసాయ పరిశోధన మండలి (ICAR) ఆధ్వర్యంలోని భోపాల్‌కు చెందిన నేషనల్ ఇన్‌స్టిట్యూట్ ఆఫ్ హై-సెక్యూరిటీ యానిమల్ డిసీజెస్ (NIHSAD) శాస్త్రవేత్తలు ఈ వ్యాక్సిన్‌ను అభివృద్ధి చేశారు. తక్కువ ధరకే రైతులకు అందుబాటులోకి రానున్న ఈ టీకా కోళ్లలో రోగనిరోధక శక్తిని పెంచి, వైరస్ వ్యాప్తిని సమర్థవంతంగా అడ్డుకోనుంది.

ఈ వ్యాక్సిన్ ఆవిష్కరణతో పౌల్ట్రీ ఉత్పత్తుల ఎగుమతులు పెరగడమే కాకుండా, విదేశీ వ్యాక్సిన్లపై ఆధారపడాల్సిన అవసరం తప్పుతుందని కేంద్ర వ్యవసాయ మంత్రిత్వ శాఖ వర్గాలు పేర్కొన్నాయి. 'ఆత్మనిర్భర్ భారత్' లక్ష్యంలో భాగంగా జంతు వ్యాధుల నియంత్రణలో ఇదొక కీలక ముందడుగు అని అధికారులు తెలిపారు.

---------------

హిందూస్తాన్ సమచార్ / Santhosha Laxmi


 rajesh pande