లక్నో, 08 నవంబర్ (హి.స.)
దేశవ్యాప్తంగా అమాయకులను భయాందోళనలకు గురిచేసి రూ. కోట్లు కొల్లగొడుతున్న సైబర్ నేరగాళ్లపై కేంద్ర హోం మంత్రిత్వ శాఖ తీవ్ర హెచ్చరికలు జారీ చేసిన నేపథ్యంలో, ఉత్తరప్రదేశ్ సైబర్ క్రైమ్ పోలీసులు ఆదివారం తెల్లవారుజామున ఒక అంతర్రాష్ట్ర నేరస్థుల ముఠా గుట్టురట్టు చేశారు. 'డిజిటల్ అరెస్ట్' పేరుతో నకిలీ సీబీఐ, ఈడీ, పోలీసు అధికారుల అవతారమెత్తి ప్రజలను బెదిరిస్తున్న ఇద్దరు కీలక నిందితులను లక్నోలో పోలీసులు అరెస్ట్ చేశారు.
పోలీసులు తెలిపిన వివరాల ప్రకారం... నిందితులు సిబీఐ, నార్కోటిక్స్ కంట్రోల్ బ్యూరో (NCB) లేదా ట్రాయ్ (TRAI) అధికారులవలె స్కైప్ (Skype) లేదా వాట్సాప్ వీడియో కాల్స్ చేసేవారు. బాధితుల పేరు మీద నిషేధిత డ్రగ్స్, నకిలీ పాస్‌పోర్టులతో పార్సెళ్లు వచ్చాయని, లేదా వారి బ్యాంక్ ఖాతాలు మనీ లాండరింగ్‌కు ఉపయోగపడ్డాయని బెదిరించేవారు. డిజిటల్ అరెస్ట్ పేరుతో బాధితులను గంటల తరబడి కెమెరా ముందు కూర్చోబెట్టి, కేసు నుంచి తప్పిస్తామని చెప్పి రూ. లక్షల నగదును తమ నకిలీ బ్యాంక్ ఖాతాలకు మళ్లించేవారు.
నిందితుల వద్ద నుంచి పలు ల్యాప్‌టాప్‌లు, 15కు పైగా స్మార్ట్‌ఫోన్లు, నకిలీ పోలీసు ఐడీ కార్డులు, రూ. 45 లక్షల నగదు ఉన్న విదేశీ బ్యాంక్ ఖాతా పత్రాలను పోలీసులు స్వాధీనం చేసుకున్నారు. దేశవ్యాప్తంగా వీరు పదుల సంఖ్యలో వృద్ధులు, రిటైర్డ్ ఉద్యోగులను మోసగించినట్లు విచారణలో తేలింది. సైబర్ బెదిరింపులకు గురైతే భయపడకుండా వెంటనే 1930 నంబర్‌కు ఫిర్యాదు చేయాలని సైబర్ పోలీసులు ప్రజలను కోరారు.
---------------
హిందూస్తాన్ సమచార్ / Santhosha Laxmi
