పల్నాడు, 15 ఫిబ్రవరి (హి.స.)

మహాశివరాత్రి పర్వదినం సందర్భంగా పల్నాడు జిల్లాలోని ప్రముఖ శైవక్షేత్రం కోటప్పకొండ భక్తులు పోటెత్తారు. త్రికోటేశ్వర స్వామిని దర్శించుకునేందుకు తెలుగు రాష్ట్రాల నలుమూలల నుంచి భక్తులు భారీగా తరలివచ్చారు. తెల్లవారుజాము నుంచే స్వామివారికి విశేష అభిషేకాలు, పూజలు నిర్వహిస్తుండగా, గిరి ప్రదక్షిణ చేసే భక్తులతో కొండ మార్గాలన్నీ కిక్కిరిసిపోయాయి. ఈ ఏడాది భక్తుల సౌకర్యార్థం దేవస్థానం ప్రత్యేక క్యూలైన్లు ఏర్పాటు చేయడమే కాకుండా, దర్శనానికి వచ్చే ప్రతి భక్తుడికి ఒక ఉచిత లడ్డూ ప్రసాదాన్ని పంపిణీ చేస్తోంది. క్షేత్రం అంతా విద్యుత్ దీపాల అలంకరణతో ఆధ్యాత్మిక శోభను సంతరించుకుంది.

కోటప్పకొండ తిరునాళ్లలో ప్రధాన ఆకర్షణగా నిలిచే విద్యుత్ ప్రభలు వివిధ గ్రామాల నుంచి మేళతాళాలు, కోలాటాల నడుమ కొండ దిగువకు చేరుకుంటున్నాయి. భక్తుల రద్దీని దృష్టిలో ఉంచుకుని ఏపీఎస్ ఆర్టీసీ పల్నాడు, గుంటూరు, ప్రకాశం జిల్లాల నుంచి ఏకంగా 618 ప్రత్యేక బస్సులను నడుపుతోంది. ఇందులో ముఖ్యంగా కొండ దిగువ నుంచి పైకి వెళ్లే భక్తుల కోసం 95 షటిల్ బస్సులు నిరంతరాయంగా సేవలు అందిస్తున్నాయి. అంతేకాకుండా, ఈ ప్రత్యేక బస్సుల్లో మహిళలకు 'మహాలక్ష్మి' పథకం కింద ఉచిత ప్రయాణ సౌకర్యం కల్పించడంతో మహిళా భక్తుల సంఖ్య భారీగా పెరిగింది. ట్రాఫిక్ ఇబ్బందులు తలెత్తకుండా పోలీసులు భారీ బందోబస్తు ఏర్పాటు చేసి, వాహనాల పార్కింగ్‌కు ప్రత్యేక ప్రాంతాలను కేటాయించారు.

---------------

హిందూస్తాన్ సమచార్ / SANDHYA PRASADA PV