ఢిల్లీ, 15,మార్చి (హి.స.) దేశంలో నేషనల్ హైవేలపై ప్రయాణించే ప్రయాణికులకు ఒక ముఖ్య సమాచారం, ఏప్రిల్ 1 నుంచి ఫాస్టాగ్ వార్షిక పాస్ ధరలు పెరుగనున్నాయి. జాతీయ రహదారులపై టోల్ చెల్లింపులను సులభతరం చేసే ఉద్దేశంతో ప్రవేశపెట్టిన ఫాస్టాగ్(FASTag) వార్షిక పాస్ పథకం ఇప్పుడు కాస్త ప్రియం కానుంది. 2026-27 ఆర్థిక సంవత్సరానికి గానూ ఈ పాస్ ధరలో స్వల్ప పెంపును అమలు చేయాలని ప్రభుత్వం నిర్ణయించింది.

భారత జాతీయ రహదారుల ప్రాధికార సంస్థ (NHAI) జారీ చేసిన అధికారిక ఉత్తర్వు ప్రకారం, ఏప్రిల్ 1 నుండి, ప్రైవేట్ వాహనాల ఫాస్టాగ్ వార్షిక పాస్ ధరను రూ.3,075కు పెంచారు. ఇంతకుముందు, ఈ ధర రూ.3,000గా ఉండేది. ఈ పాస్ ప్రైవేట్ కార్లు, జీపులు, వ్యాన్ల వంటి వాణిజ్యేతర వాహనాలకు వర్తిస్తుంది.

రహదారులపై పదే పదే టోల్ చెల్లించాల్సిన ఇబ్బందిని తొలగించడం, డిజిటల్ పద్ధతిలో టోల్ వసూళ్లను ప్రోత్సహించడం దీని ప్రధాన లక్ష్యం. FASTag కలిగిన ఏ ప్రైవేట్ వాహనమైనా ఈ పాస్ను కొనుగోలు చేయడానికి అర్హత కలిగి ఉంటుంది. ఒకసారి యాక్టివేట్ అయిన తర్వాత, ఈ వార్షిక పాస్ ఒక సంవత్సరం పాటు లేదా గరిష్టంగా 200 ప్రయాణాల వరకు చెల్లుబాటు అవుతుంది, ఈ రెండింటిలో ఏది ముందుగా పూర్తయితే అంతవరకు ఇది వర్తిస్తుంది.

---------------

హిందూస్తాన్ సమచార్ / నిత్తల రాజీవ