కోల్కతా:, 07 ఏప్రిల్ (హి.స.)
పశ్చిమ బెంగాల్ అసెంబ్లీ ఎన్నికల వేళ రాజకీయ వాతావరణం ఒక్కసారిగా వేడెక్కింది. తృణమూల్ కాంగ్రెస్ అధినేత్రి, ముఖ్యమంత్రి మమతా బెనర్జీ కేంద్రంలోని బీజేపీ ప్రభుత్వంపై అత్యంత భీకరమైన ఆరోపణలు చేశారు. ఎన్నికల్లో రాజకీయ లబ్ధి పొందేందుకు బీజేపీ పహల్గామ్ తరహా ఉగ్రదాడికి బ్లూప్రింట్ సిద్ధం చేసిందని ఆమె వ్యాఖ్యానించడం దేశవ్యాప్తంగా చర్చనీయాంశమైంది.
ముర్షిదాబాద్లో జరిగిన భారీ బహిరంగ సభలో ప్రసంగిస్తూ, మమతా బెనర్జీ తన వద్ద ఉన్న సమాచారం ప్రకారం బీజేపీ పక్కా ప్రణాళికతో అశాంతిని సృష్టించేందుకు ప్రయత్నిస్తోందని ఆరోపించారు. గతంలో పుల్వామా ఘటన ఎలా జరిగిందో మనందరికీ తెలుసు. ఇప్పుడు మళ్లీ ఎన్నికల ముందు పహల్గామ్ తరహా దాడులను రాష్ట్రంలో ప్రేరేపించి, ప్రజల్లో భయాందోళనలు సృష్టించాలని చూస్తున్నారు. తద్వారా రాష్ట్రంలో శాంతిభద్రతలు క్షీణించాయని చూపి, రాష్ట్రపతి పాలన విధించాలనేది వారి కుట్ర, అని ఆమె మండిపడ్డారు.
అంతేకాకుండా, పాకిస్థాన్ రక్షణ మంత్రి ఖవాజా ఆసిఫ్ ఇటీవల కోల్కతాపై దాడులు చేస్తామని చేసిన హెచ్చరికలపై ప్రధానమంత్రి నరేంద్ర మోదీ మౌనాన్ని ఆమె ప్రశ్నించారు. దేశ భద్రత ప్రమాదంలో ఉన్నప్పుడు ప్రధాని తన ఎన్నికల ప్రచారాల్లో బిజీగా ఉండటం ఆశ్చర్యకరం. పొరుగు దేశం నుండి ముప్పు పొంచి ఉన్నా కేంద్రం ఎందుకు స్పందించడం లేదు? అని నిలదీశారు.
మరోవైపు, ఈ వ్యాఖ్యలపై బీజేపీ తీవ్రంగా స్పందించింది. మమతా బెనర్జీ తన ఓటు బ్యాంకును కాపాడుకోవడానికి ఉగ్రవాదం వంటి సున్నితమైన అంశాలను వాడుకుంటున్నారని, ఇది భద్రతా దళాలను అవమానించడమేనని బీజేపీ ప్రతినిధులు విమర్శించారు. ఎన్నికల కమిషన్ ఈ బాధ్యతారాహిత్యమైన వ్యాఖ్యలపై చర్యలు తీసుకోవాలని డిమాండ్ చేశారు. ఈ ఆరోపణలు-ప్రత్యారోపణలతో బెంగాల్ రాజకీయాలు ప్రస్తుతం రణరంగాన్ని తలపిస్తున్నాయి.
---------------
హిందూస్తాన్ సమచార్ / Santhosha Laxmi
