తడ, 14 మే (హి.స.)

తిరుపతి జిల్లా తడ శివాలయం సమీపంలో జాతీయ రహదారి రక్షణ గోడను ఢీకొని ప్రైవేటు బస్సు బోల్తా పడింది. శ్రీసిటీకి కార్మికులు, శిక్షణ విద్యార్థులతో వెళ్తున్న సమయంలో ఈ ప్రమాదం జరిగింది. పోలీసులు తెలిపిన వివరాల ప్రకారం.. దొరవారిసత్రం నుంచి బస్సు శ్రీసిటీలోని ఓ పరిశ్రమకు బయలుదేరింది. సూళ్లూరుపేట, కొండూరు వద్ద పలువురు బస్సెక్కారు. దాదాపు 30 మంది వరకు అందులో ప్రయాణిస్తున్నారు. చీరాల ఇంజినీరింగ్ కాలేజీ, ఆత్మకూరు ప్రభుత్వ పాలిటెక్నిక్ కాలేజీకి చెందిన డిప్లొమా విద్యార్థులు టీవీఎస్ పరిశ్రమలో ఇంటర్న్షిప్ కోసం అదే బస్సులో ఎక్కారు. ఈ క్రమంలో జిల్లా తడ శివాలయం సమీపంలో ప్రమాదానికి గురైంది. ఈ ఘటనలో కృష్ణతేజ, రక్షితశ్రీ, మనోజ్, హర్షద్, అఖిల తీవ్రంగా గాయపడ్డారు. మిగిలిన వారు స్వల్ప గాయాలతో బయటపడ్డారు. తీవ్రంగా గాయపడిన వారిని స్థానిక ప్రభుత్వ ఆసుపత్రిలో ప్రథమ చికిత్స చేశారు. మెరుగైన చికిత్స కోసం రక్షితశ్రీని సూళ్లూరుపేటకు తరలించారు.

---------------

హిందూస్తాన్ సమచార్ / నిత్తల రాజీవ