కలకత్తా 11 జూన్ (హి.స)

తృణమూల్ కాంగ్రెస్ (TMC) పార్టీకి, మమతా బెనర్జీ నాయకత్వానికి మరో భారీ షాక్ తగిలింది. ఆ పార్టీకి చెందిన రాజ్యసభ ఎంపీ ప్రకాష్ చిక్ బరాయిక్ తన పదవికి, అలాగే పార్టీ ప్రాథమిక సభ్యత్వానికి గురువారం (జూన్ 11, 2026) రాజీనామా చేశారు. ఆయన తన అధికారిక రాజీనామా లేఖను రాజ్యసభ చైర్మన్, ఉపరాష్ట్రపతి సి.పి. రాధాకృష్ణన్కు సమర్పించారు. పశ్చిమ బెంగాల్ అసెంబ్లీ ఎన్నికల్లో ప్రజలు భారతీయ జనతా పార్టీ (BJP)కి స్పష్టమైన చారిత్రక తీర్పు ఇచ్చారని, ప్రజల ప్రజాస్వామ్య నిర్ణయాన్ని గౌరవిస్తూనే తాను ఈ నిర్ణయం తీసుకున్నట్లు బరాయిక్ స్పష్టం చేశారు.పశ్చిమ బెంగాల్ ఎన్నికల్లో ఓటమి తర్వాత తృణమూల్ కాంగ్రెస్లో రేగిన అంతర్గత తిరుగుబాటు ఈ రాజీనామాతో మరింత తీవ్ర రూపం దాల్చింది. ఈ ఒక్క వారంలోనే తృణమూల్ కాంగ్రెస్ను వీడిన మూడో రాజ్యసభ సభ్యుడు బరాయిక్ కావడం గమనార్హం. అంతకుముందు సోమవారం సీనియర్ నాయకుడు సుఖేందు శేఖర్ రాయ్, బుధవారం సుస్మితా దేవ్ కూడా పార్టీకి, పదవులకు రాజీనామా చేశారు. ఈ వరుస నిష్క్రమణల వల్ల రాజ్యసభలో తృణమూల్ కాంగ్రెస్ బలం 13 నుండి 10 స్థానాలకు పడిపోయింది.పార్లమెంట్ సభ్యులే కాకుండా బెంగాల్ అసెంబ్లీలో కూడా మమతా బెనర్జీకి గట్టి ఎదురుదెబ్బ తగిలింది. పార్టీ నుండి బహిష్కరణకు గురైన రీతాబ్రతా బెనర్జీ నాయకత్వంలో మొత్తం 80 మంది టీఎంసీ ఎమ్మెల్యేలలో 58 మంది తిరుగుబాటు చేసి ప్రత్యేక గ్రూపుగా ఏర్పడ్డారు. లోక్సభలో ఉన్న టీఎంసీ ఎంపీలు కూడా విడిపోవడానికి ప్రయత్నిస్తున్నట్లు సమాచారం. ఒకప్పుడు అభిషేక్ బెనర్జీకి అత్యంత ఆప్తుడిగా, ఉత్తర బెంగాల్ ప్రాంతంలో పార్టీకి కీలక అండగా ఉన్న ప్రకాష్ చిక్ బరాయిక్ వైదొలగడం, బీజేపీ వేవ్ను సమర్థించడం తృణమూల్ కాంగ్రెస్ పతనానికి స్పష్టమైన సంకేతంగా రాజకీయ విశ్లేషకులు భావిస్తున్నారు.

హిందూస్తాన్ సమచార్ / Santhosha Laxmi