హైదరాబాద్, 17 జూన్ (హి.స.)

నీట్-యూజీ 2026 పేపర్ లీక్ వివాదంపై నిరసనలు వెల్లువెత్తుతున్న తరుణంలో, జైపూర్లో తనపై జరిగిన దాడి వెనుక రాష్ట్రీయ స్వయంసేవక్ సంఘ్ (ఆరెస్సెస్) హస్తం ఉందని కాక్రోచ్ జనతా పార్టీ (సీజేపీ) వ్యవస్థాపకుడు అభిజీత్ దీప్కే సంచలన ఆరోపణలు చేశారు. నీట్ కుంభకోణం నుంచి ప్రజల దృష్టిని మళ్లించేందుకే ఈ దాడికి పాల్పడ్డారని, విద్యార్థుల గొంతు నొక్కే ప్రయత్నం జరుగుతోందని ఆయన విమర్శించారు.

మంగళవారం నాగ్పూర్లో దీప్కే మాట్లాడుతూ.. ఇటువంటి దాడులకు తాము భయపడే ప్రసక్తే లేదని స్పష్టం చేశారు. తామంతా గాంధీ, అంబేద్కర్ల ఆశయాల బాటలో నడిచే సత్యాగ్రహులమని, కేంద్ర విద్యాశాఖ మంత్రి ధర్మేంద్ర ప్రధాన్ రాజీనామా చేసే వరకు తమ శాంతియుత పోరాటం కొనసాగుతుందని ఆయన తేల్చిచెప్పారు.

సోమవారం జైపూర్లో నిర్వహించిన నిరసన ర్యాలీలో, కార్యకర్తల భుజాలపై ఉన్న దీప్కేపై కొందరు గుర్తుతెలియని వ్యక్తులు భౌతిక దాడికి పాల్పడ్డారు. ఈ ఘటనకు సంబంధించి ఇద్దరు యువకులను పోలీసులు అదుపులోకి తీసుకుని విచారిస్తున్నారు.

నీట్ పరీక్షలో జరిగిన అవకతవకలకు నైతిక బాధ్యత వహిస్తూ కేంద్ర మంత్రి ధర్మేంద్ర ప్రధాన్ తన పదవికి రాజీనామా చేయాలని సీజేపీ డిమాండ్ చేస్తోంది. ఈ నెల 21న నీట్ పునఃపరీక్ష జరగనుంది. ఈ వివాదంపై పోరాడేందుకు అమెరికా నుంచి తిరిగి వచ్చిన దీప్కే, ఢిల్లీలోని జంతర్ మంతర్తో పాటు దేశవ్యాప్తంగా పలు నగరాల్లో జరుగుతున్న ఆందోళనలకు నాయకత్వం వహిస్తున్నారు. కాగా, దీప్కే చేసిన ఆరోపణలపై ఆరెస్సెస్ లేదా కేంద్ర విద్యా మంత్రిత్వ శాఖ నుంచి ఇప్పటివరకు ఎలాంటి అధికారిక స్పందన రాలేదు. జైపూర్ దాడి ఘటనపై పోలీసులు దర్యాప్తు కొనసాగిస్తున్నారు.

---------------

హిందూస్తాన్ సమచార్ / Santhosha Laxmi