కోల్కతా, 24 జూన్ (హి.స.)పశ్చిమ బెంగాల్ పాఠశాలల్లో మధ్యాహ్న భోజన పథకం నుండి గుడ్లను తొలగించబోతున్నారనే వార్తలపై తృణమూల్ కాంగ్రెస్ (TMC) రాజ్యసభ నేత డెరెక్ ఓబ్రెయిన్ బుధవారం బీజేపీ ప్రభుత్వంపై తీవ్ర విమర్శలు గుప్పించారు. గుడ్లను తొలగించడం ద్వారా చిన్నారులకు అందే పౌష్టికాహారాన్ని దూరం చేస్తున్నారని, రాష్ట్ర ప్రజలపై బలవంతంగా శాఖాహారాన్ని రుద్దడానికి బీజేపీ ప్రయత్నిస్తోందని ఆయన సోషల్ మీడియా వేదికగా ఆరోపించారు. కోల్కతా మున్సిపల్ కార్పొరేషన్ పరిధిలోని పాఠశాలల్లో మధ్యాహ్న భోజన బాధ్యతలను ఇస్కాన్ (ISKCON) సంస్థకు అప్పగించడంతో ఈ వివాదం మొదలైంది. సోషల్ మీడియాలో గుడ్ల స్థానంలో పనీర్, సోయాబీన్ ఇవ్వబోతున్నారనే ప్రతిపాదిత మెనూ ప్రచారంలోకి రావడంతో టీఎంసీ నేత ఈ స్పందన తెలియజేశారు.అయితే, ఈ వివాదంపై ఇస్కాన్ కోల్కతా వైస్ ప్రెసిడెంట్ రాధారామన్ దాస్ తక్షణమే స్పందిస్తూ క్లారిటీ ఇచ్చారు. ప్రస్తుతం సోషల్ మీడియాలో ప్రచారమవుతున్న మధ్యాహ్న భోజన మెనూతో తమకు ఎలాంటి సంబంధం లేదని, తాము అలాంటి జాబితాను విడుదల చేయలేదని స్పష్టం చేశారు. ఇంకా ఎలాంటి మెనూ ఖరారు కాలేదని, తుది నిర్ణయం తీసుకున్న తర్వాత అధికారికంగా ప్రకటిస్తామని చెబుతూ తప్పుడు వార్తలను నమ్మవద్దని ఆయన ప్రజలను కోరారు.

---------------

హిందూస్తాన్ సమచార్ / Santhosha Laxmi