హైదరాబాద్, 24 జూలై (హి.స.)

నీట్ (NEET) పేపర్ లీక్ వివాదం నేపథ్యంలో ఉన్నత విద్యాశాఖ కార్యదర్శి వినీత్ జోషిని తొలగించి, ఆయన స్థానంలో నరేష్ గంగ్వార్‌ను నియమించినట్లు కేంద్ర ప్రభుత్వం ప్రకటించింది. దీనితో పాటు పేపర్ లీక్ కేసుల వేగవంతమైన విచారణకు ప్రత్యేక ఫాస్ట్ ట్రాక్ కోర్టులను ఏర్పాటు చేస్తున్నట్లు ప్రకటించిన కొద్దిసేపటికే, ప్రధానమంత్రి నరేంద్ర మోదీ గురువారం అర్థరాత్రి ఒక వీడియో సందేశాన్ని విడుదల చేశారు. ఈరోజు (జూలై 24, శుక్రవారం) జరగబోయే కేంద్ర క్యాబినెట్ సమావేశంలో పేపర్ లీక్‌లకు వ్యతిరేకంగా మరిన్ని కఠినమైన నిబంధనలతో కూడిన బిల్లును చర్చించి ఖరారు చేస్తామని, వచ్చే వారం (సోమవారం నుండి) ప్రారంభమయ్యే పార్లమెంట్ సమావేశాల్లోనే ఈ కొత్త చట్టాన్ని వీలైనంత త్వరగా ఆమోదింపజేసేందుకు ప్రయత్నిస్తామని ప్రధాని స్పష్టం చేశారు. గత రెండున్నర నెలల్లో నిందితులను పట్టుకుని జైలుకు పంపామని, 22 లక్షల మంది విద్యార్థుల విద్యాసంవత్సరం వృధా కాకుండా జూలై 19నే ఫలితాలు వెల్లడించామని ఆయన పేర్కొన్నారు.ప్రధాని మోదీ అర్థరాత్రి విడుదల చేసిన ఈ వీడియోపై లోక్‌సభ ప్రతిపక్ష నేత రాహుల్ గాంధీ 'X' (ట్విట్టర్) వేదికగా తీవ్రంగా విరుచుకుపడ్డారు. విద్యార్థులు కేంద్ర విద్యాశాఖ మంత్రి ధర్మేంద్ర ప్రధాన్ రాజీనామాను డిమాండ్ చేస్తుంటే, ప్రధాని ఇలాంటి అర్థరాత్రి వీడియోలతో వారి తెలివితేటలను అవమానించవద్దని మండిపడ్డారు. రాహుల్ గాంధీ ప్రధానంగా మూడు డిమాండ్లను లేవనెత్తారు; మొదటిది విద్యాశాఖ మంత్రి ధర్మేంద్ర ప్రధాన్‌ను తక్షణమే పదవి నుంచి తొలగించడం, రెండోది నిరసనలు తెలిపిన విద్యార్థులపై లాఠీఛార్జ్ చేసిన పోలీసులను శిక్షించడం, మరియు మూడోది దేశంలోని విద్యార్థులందరికీ ప్రధాని బహిరంగ క్షమాపణ చెప్పడం. కేంద్ర ప్రభుత్వం తేవాలనుకుంటున్న కొత్త చట్టం విద్యార్థుల భవిష్యత్తుకు ఎంతవరకు న్యాయం చేస్తుందోనని ప్రతిపక్షాలు ప్రశ్నిస్తున్నాయి

---------------

హిందూస్తాన్ సమచార్ / Santhosha Laxmi