హైదరాబాద్, 08 జూలై (హి.స.)

భారతీయ కంపెనీలు ఆర్టిఫిషియల్ ఇంటెలిజెన్స్ (ఏఐ) వినియోగంలో వేగంగా ముందుకు సాగుతున్నప్పటికీ, అందుకు అవసరమైన నైపుణ్యాలున్న ఉద్యోగుల సంఖ్య మాత్రం ఆందోళనకరంగా తగ్గుతోంది. కేవలం 25 శాతం కంపెనీలు మాత్రమే తమ సిబ్బంది ఏఐని ఉపయోగించుకోవడానికి పూర్తిగా సిద్ధంగా ఉన్నారని ప్రముఖ టెక్నాలజీ సంస్థ 'కైండ్రిల్' విడుదల చేసిన నివేదికలో వెల్లడించింది. 2025తో పోలిస్తే ఇది 12 పాయింట్లు తక్కువ కావడం గమనార్హం. మరోవైపు వ్యాపార ప్రక్రియల్లో ఏఐని విస్తృతంగా అమలు చేస్తున్న సంస్థల సంఖ్య 2025లో 36 శాతం ఉండగా, ఇప్పుడు 56 శాతానికి పెరిగింది.

ఈ గణాంకాలు ఏఐ వాడకం, ఉద్యోగుల సన్నద్ధత మధ్య అగాధం పెరుగుతోందని స్పష్టం చేస్తున్నాయి. దాదాపు 81 శాతం మంది భారతీయ వ్యాపార నాయకులు, ఏఐ పురోగతి వేగాన్ని తమ ఉద్యోగుల సామర్థ్యాలు, సంస్థాగత పాలనా విధానాలు అందుకోలేకపోతున్నాయని ఆందోళన వ్యక్తం చేస్తున్నారు. రాబోయే 12 నెలల్లో అటానమస్ ఏఐ (మానవ ప్రమేయం లేని ఏఐ) కీలక నిర్ణయాలు తీసుకుంటుందని 84 శాతం సంస్థలు అంచనా వేస్తుండగా, కేవలం 28 శాతం మాత్రమే మానవ పర్యవేక్షణ లేకుండా పనిచేసే వ్యవస్థలపై పూర్తి నమ్మకం ఉంచుతున్నాయి.

ఈ మార్పులకు అనుగుణంగా కంపెనీలు కొన్ని కీలక చర్యలు చేపడుతున్నాయి. భారత్‌లో సర్వే చేసిన సంస్థల్లో 69 శాతం, ఏఐ అమలుకు వీలుగా ఉద్యోగాల స్వరూపాన్ని పునఃరూపకల్పన చేస్తున్నాయి. అలాగే, 33 శాతం సంస్థలు ఉద్యోగులకు నైపుణ్యాలు పెంచేందుకు ప్రత్యేక బడ్జెట్లు, శిక్షణా వ్యూహాలను అమలు చేస్తున్నాయి. అయినప్పటికీ, పాలన, నమ్మకం, పర్యవేక్షణ వంటి అంశాల్లో పురోగతి నెమ్మదిగా ఉందని నివేదిక పేర్కొంది.

ఈ అంశంపై కైండ్రిల్ ఇండియా ఆసియా పసిఫిక్ ప్రెసిడెంట్ లింగరాజు సావకర్ మాట్లాడుతూ.. టెక్నాలజీ వినియోగంలో భారత్ ఎప్పుడూ ముందుంటుంది. సంస్థలు తమ కార్యకలాపాల్లో ఏఐని వేగంగా అమలు చేస్తున్నాయి. అయితే, ఈ సాంకేతికత పూర్తి ప్రయోజనాలను పొందాలంటే వ్యాపారాలు తమ పనివిధానాన్ని పునఃపరిశీలించాలి. ఉద్యోగాల స్వరూపాన్ని మార్చాలి, కొత్త సామర్థ్యాలు నిర్మించుకోవాలి, నమ్మకాన్ని పెంచేలా పటిష్టమైన పాలనా విధానాలను ఏర్పాటు చేయాలి అని వివరించారు.

ఏఐ విజయం అనేది కేవలం టెక్నాలజీ లేదా వ్యూహాలపై ఆధారపడి ఉండదని, పని విధానాన్ని మార్చడం, సంస్థాగత మార్పులను సమర్థంగా నిర్వహించడంపైనే ఆధారపడి ఉంటుందని నివేదిక స్పష్టం చేసింది. భారత్‌తో సహా 8 దేశాల్లో 1,100 మంది సీనియర్ బిజినెస్, టెక్నాలజీ లీడర్ల అభిప్రాయాలతో ఈ గ్లోబల్ సర్వేను రూపొందించారు.

---------------

హిందూస్తాన్ సమచార్ / Santhosha Laxmi