ఢిల్లీ, 12 ఆగస్టు (హి.స.)

భారత మాజీ రాష్ట్రపతి రామ్నాథ్ కోవింద్ రచించిన ఆత్మకథ 'ట్రయంఫ్ ఆఫ్ ది ఇండియన్ రిపబ్లిక్: మై లైఫ్, మై స్ట్రగుల్స్' (భారత గణతంత్ర విజయం: నా జీవితం, నా పోరాటం) పుస్తకాన్ని ప్రధాని నరేంద్ర మోడీ ఢిల్లీలో ఘనంగా ఆవిష్కరించారు. రామ్నాథ్ కోవింద్ వ్యక్తిగత జీవితం, ఆయన ఎదుర్కొన్న సవాళ్లు, సుదీర్ఘ ప్రజా జీవిత అనుభవాల సమాహారంతో ఈ పుస్తకం రూపుదిద్దుకుంది. ఒక సామాన్య కుటుంబం నుంచి సాధారణ పౌరుడిగా ప్రస్థానాన్ని ప్రారంభించి, దేశ అత్యున్నత రాష్ట్రపతి పదవి వరకు ఎదిగిన కోవింద్ జీవిత ప్రయాణం భారత ప్రజాస్వామ్య గొప్పతనానికి నిలువెత్తు నిదర్శనమని ప్రధాని మోడీ ఈ సందర్భంగా కొనియాడారు.

పుస్తకావిష్కరణ అనంతరం ప్రధాని మోడీ మాట్లాడుతూ.. రామ్నాథ్ కోవింద్ జీవితం, ఆయన పాటించిన క్రమశిక్షణ, వినయం, రాజ్యాంగ విలువలు నేటి యువతకు ఎంతో ఆదర్శనీయమని పేర్కొన్నారు. భారత ప్రజాస్వామ్యం ప్రతి ఒక్కరికీ అత్యున్నత అవకాశాలను కల్పిస్తుందనడానికి కోవింద్ జీవితమే ఒక ఉదాహరణ అని అన్నారు. ఈ ఆత్మకథకు ఆయన ఎంచుకున్న పేరు ఎంతో సముచితంగా ఉందని, భవిష్యత్ తరాలకు, భారత ప్రజాస్వామ్య చరిత్రకు ఈ పుస్తకం ఒక విలువైన వారసత్వంగా నిలిచిపోతుందని ప్రధాని మోడీ ప్రశంసలు కురిపించారు.

---------------

హిందూస్తాన్ సమచార్ / SANDHYA PRASADA PV