హైదరాబాద్, 14 ఆగస్టు (హి.స.)

తమిళనాడులోని వేలూరు జిల్లాలో తీవ్ర కలకలం రేపిన ఘోర సంఘటన జరిగింది. విధులు నిర్వర్తిస్తున్న ఒక మహిళా హెడ్ కానిస్టేబుల్‌ను ఆమె భర్త దారుణంగా చాకుతో పొడిచి హత్య చేశాడు.

బాధితురాలు వేలూరు పరిధిలోని పోలీస్ స్టేషన్‌లో హెడ్ కానిస్టేబుల్‌గా పనిచేస్తున్నారు. దంపతుల మధ్య గత కొంతకాలంగా కుటుంబ కలహాలు, విభేదాలు కొనసాగుతున్నట్లు తెలుస్తోంది. భార్యాభర్తల మధ్య గొడవ తీవ్రస్థాయికి చేరడంతో, ఆగ్రహంతో ఊగిపోయిన భర్త ఒక్కసారిగా చాకుతో ఆమెపై విచక్షణారహితంగా దాడి చేశాడు.

ఈ దాడిలో చాకుపోట్లు తీవ్రంగా తగలడంతో ఆమె అక్కడికక్కడే రక్తం మడుగులో పడిపోయారు. సమాచారం అందుకున్న వెంటనే పోలీసులు సంఘటనా స్థలానికి చేరుకుని పరిశీలించారు. మృతదేహాన్ని పోస్టుమార్టం నిమిత్తం ప్రభుత్వ ఆసుపత్రికి తరలించారు. నిందితుడైన భర్తను పోలీసులు అదుపులోకి తీసుకుని, హత్యకు గల పూర్తి కారణాలపై కేసు నమోదు చేసి విచారణ జరుపుతున్నారు. రక్షణ కల్పించే పోలీస్ శాఖలోనే పనిచేస్తున్న మహిళకు సొంత భర్త చేతిలోనే ఈ పరిస్థితి ఎదురుకావడం స్థానికంగా తీవ్ర దిగ్భ్రాంతిని కలిగించింది.

---------------

హిందూస్తాన్ సమచార్ / Santhosha Laxmi